Malnutrición

Nina con sintomas importants de desnutrizión. A fotografía, de zaguerías d'os años 60, amostra un d'os muitos casos de kwashiorkor trobatos en os campamentos de refuchiatos nicherians mientres d'a guerra entre Nicheria e Biafra.

A malnutrizión ye un termín cheneral emplegato ta describir una condizión sanitaria causata por una inadecuata u insufizient alimentazión e nutrizión; por una alimentazión incorrecta que resulta d'una asimilazión defizient, una dieta probe u una sobrealimentazión. En funzión d'os nutrients que se troban de traza defizient u en eszeso en a dieta, pueden produzir-se una serie de trastorns d'a nutrizión.

A Organizazión Mundial d'a Salut nombra la fambre como a más grieu amenaza ta o mundo d'a salut publica. A desnutrizión ye, por muito, o mayor contribuyent á la mortalitat infantil, present en a metat d'os casos de muerte. A malnutrizión, en a forma d'a manca de yodo ye a causa más común de defizienzia u retardo mental, a reduzión d'o cozient inteleutual d'o mundo con una estimazión de mil millons de puntos. A millora en o estato de nutrizión d'a poblazión ye l'azión que, de traza mayoritaria, se considera como a forma más eficaz d'aduya debant d'iste problema.

A malnutrizión ye o resultato d'una alimentazión incorreuta, ya siga por alimentazión defizitaria, una sobrealimentazión u por asimilazión defizient. Os alimentos que se prenen diariament mos proporzionan a enerchía nezesaria ta poder fer as nuestras autibidaz diarias. A manca u o eszeso d'alimentos puet prebocar malautías.

A malnutrizión ocasionata por alimentazión incorreuta por defeuto de nutrients ha representato a fambre en a mayoría d'os países d'o mundo dica o sieglo XVII e encara en os siguients. Autualment contina abendo una desnutrizión d'un grau bariable en muitas zonas subdesarrollatas economicament más que más d'Africa, Asia e America d'o Sur. Á la begata en os países más ricos e atros meyanament desembolicatos, a obesidat ha puyato tanto que se considera un d'os prenzipals problemas ta la salut d'a poblazión.

A malnutrizión por asimilazión defizient ye a menos important d'as tres causas de malnutrizión e a unica en a cuala en o suyo alcanze no i tienen un papel preponderant fautors sozials e economicos. O progreso d'a medezina ha disminuyito muito a inzidenzia d'os trastornos por asimilazión defizient d'os alimentos.