Árbol

Un caxico en Dinamarca.

Árbols nebatos en o Fornigal.

Un árbol ye una planta que puet crexer dica más de zinco metros d'altaria grazias á una estrutura que forma un tronco, e ebentualment ramificazions ditas ramas e brancas. Os árbols son plantas perennes que por un regular biben muitos años. En o sentito botanico, os árbols son plantas con fusta. A fusta, conoxita tamién como xilema secundario, se produze por una capa de zelulas, o cambium bascular, situata baxo a crosta.

A formazión d'a fusta ye un prozeso repetitibo que superposa una nueba capa denzima d'as anteriors. O resultato á sobent ye bisible en forma d'aniellos de creximiento. Os unicos grupos que contienen plantas con fusta, e por tanto árbols en o sentito estricto d'o termín, son as gimnospermas e as anchiospermas dicotiledonias. Os árbols presentan una mayor lonchebidat que atros tipos de plantas. Bellas espezies d'árbols (como as secuoyas) pueden blincar d'os 100 m d'altaria, e gosan bibir mils de años.

Os primers árbols aparexen en a Tierra fa bels 370 millons d'años, en o periodo Debonián, e yeran os debampasatos d'as coniferas autuals. O desembolique en altaria e a ramificazión d'as brancas premiten á los árbols aumentar a suya capazidat d'espleitazión d'o espazio aerio. A distribuzión d'as fuellas á diferents rans premite á l'árbol aumentar a superfizie d'intercambeyo ta la fotosintesis. A suya gran capazidat fotosintetica fa que os árbol chuguen un papel important en os ziclos ecolochicos terrestres, grazias á la suya capazidat d'almadazenamiento de carbonio, o suyo rol en o ziclo de l'augua, e a formazión d'os ecosistemas complexos que son as selbas, fuent e refuchios d'a biodibersidat.

Os árbols tamién representan una fuent considerable de recursos ta la espezie umana, tanto de materials (prenzipalment fusta) como de probisions (particularment fruitos), entre atros. Ocupan un puesto reyal e simbolic important en cuasi totas as culturas d'o mundo.

Se beiga tamién

• Árbol de Sobrarbe
• Árbols sagratos