Val de Viadors

Este articlo parla sobre la val de Viadors. Pa atros emplegos d'el toponimo Viadors se veiga Viadors (desambigación).

Esta fuella ye escrita en chistabín.

Plantilla:Infobox val La Val de Viadors, que bela vez se troba encara escrito en grafía castellana como Viadós u Biadós per cómo suena, ye el nombre como se diz a'l sector más alto de la val d'el río Cinqueta, dende aon s'achunta el Cinqueta d'Anyes Cruces con el Cinqueta de la Pez y dica aon s'enfaixona el río pe'l congosto que l'ha de lievar ta el puent d'es Pecadors, puesto aon s'ubre ya el curso y prencipia la val de Chistau.

Viadors ye una zona ubierta y solana entre montanyas bien altas que se troba dezaga d'el dito congosto, y es chistabins, es habitants de la val de Chistau, la emplegaban pa feners y bel atro cautivo, como trunfas, que dimpués s'almagazenaba en as bordas que i son. Tamién yera un puesto de paso d'es camins que diban dende Chistau en ta Francia y per ixo, cómo no, se i va fere muto contrabando. Agora Viadors s'emplega más que más pa fer paixentar el bistiar. I hai una ermita, que en dicen la Virgen Blanca. Tamién i ha un cámping y la cabana de Viadors pa es montanyers y es excursionistas que s'arriman.

Las montanyas más altas que se veyen dende Viadors son, en sentiu horario y comenzando a las seis: el pico de l'Orbar y el collau de la Cruz de Guardia, el pico de la Parda, la Suelsa, l'Ordiceto, la tuca Blanca, la punta Cabalera, la Culfreda, la Vachimala, la Lardana y la Lardaneta y la punta Alta d'es Leners ya en rematando. Qualcunas d'estas montanyas pasan t'alto d'es 3000 metros. Tamién son a saber qué vistables el Montó, arronchadet y tapau de selva de pins negros, y el puntal de Barrau con la suya forma de cilindro.

Se veiga tamién

• Río Cinqueta de la Pez.
• Val de Taberners.
• Río Cinqueta d'Anyes Cruces.
• Val de Chistau.