Cullestro

O cullestro u cullestre ye lo liquido segregato per as glandulas mamarias d'as fembras d'os mamifers dende que son amanatas a parir dica os días siguients a lo parto, con una composición pareixita d'a leit ordinaria, pero més rica en proteinas y graixa, que lo fan d'estar més espeso. O cullestro contien tamién inmunoglobulinas solubles en cantidatz importants, adestinatas a suplir a mengua que en tiene lo cadiello, leucocitos y altras substancias que no serían guaire tipicas en a leit normal. A presencia d'estas substancias y d'albumina le dan a color amarellisca.

En qualques tipos d'aus (p. ex. as columbiformes), o papo d'os adultos tamién secreta substancias especials d'apariencia serosa, que fan parte d'o suquet on i van banyatas as restas solidas con que empapetan a os polletz. A substancia esta se diz cullestro de papo.

En a cultura tradicional, se diz que os animals chicotz (y tamién os ninons humans) heban de tetar o cullestro lo menos de so mai antes d'alpartar-los perque si no moriban. Esto pareix que tiene fundamento en a función d'inoculación inmunolochica inicial ta la criatura que lo cullestro l'alporta, dando-le os primers y prencipals limfocitos maduros que demanan d'a mai, y ansinas privan que muera per infeccions posteriors a lo parto. En as mullers sobreparitas d'enantes, quan o chicot s'heba puesto salvar pero no pas la mai, el feban tetar de lo calabre ta que aproveitás o cullestro materno, pos la teta d'a muller conserva lo reflexo d'expulsión de cullestro quan o chicanón en espita ta fora dica quantas horas que siga muerta. Ixo yera prencipal ta que podese escapar, lo menos, o nino.