División territorial d'Espanya de 1833

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A división territorial d'Espanya de 1833 fue una gran reforma d'a organización territorial y administrativa d'o Estau Espanyol, que pasó de dividir-se en correchimientos a fer-lo en provincias, cambeando-ie no solo es nombres sino reorganizando lo territorio arredol d'una capital dotada d'os instrumentos mas tipicos d'o Estau, como cuartels, chuzgaus y gobernador civil, que dependeban directament d'o gubierno d'Espanya.

Antecedents

A reorganización territorial fue consecuencia indirecta d'a muerte de Ferrando VII d'Espanya, o 29 de setiembre de 1833. A suya rechent, a reina María Cristina de Borbón, miró d'achustar as posicions y fer un alcuerdo con os partidarios d'o infant Carlos María Isidro. Ixa fue a misión que le confirió a Francisco Cea Bermúdez, que formó un gubierno provisional que no duraría sique tres meses, pero que entre belatras cosas emprendería la reforma territorial que con pocas modificacions dura dica l'actualidat.

O Secretaire d'Estau de Fomento de Cea Bermúdez, Javier de Burgos, creyó por meyo d'una simple circular un Estau centralizau dividiu en 49 provincias. As provincias prenión nombre d'as suyas capitals, sacando-ne cuatro d'ellas que conservón nombres tradicionals: Navarra con capital en Pamplona, Alaba con capital en Vitoria, Bizcaya con capital en Bilbao y Guipuzcua con capital en Sant Sabastián. O prochecto de De Burgos yera tansament diferent d'unatro de 1822, pero sin as provincias d'o Bierzo, Calatayú y Exativa.

División provincial

A división de Javier de Burgos de 1833 incluiba 49 provincias. O mesmo decreto que creyó a división provincial agrupó ixas provincias en "rechions historicas". Manimenos, o decreto de De Burgos no pretendeba construir garra livel administrativo superior a o provincial. Asinas, as rechions definidas no teneban garra competencia ni organos administrativos ni churisdiccionals, sin pretensions de que estasen operativas administrativament.^[1]

Andalucía: Almería, Cádiz, Chayén, Cordoba, Granada, Malaga, Sevilla y Uelba.

Aragón: Teruel, Uesca y Zaragoza.

Asturias: Oviedo.

Balears: Palma.

Bascongadas: Alaba, Guipuzcua y Bizcaya.

Canarias: Santa Cruz de Tenerife.

Castiella la Nueva: Ciudad Real, Cuenca, Guadalfachara, Madrit y Toledo.

Castiella la Viella: Ávila, Burgos, Logronyo, Palencia, Santander, Segovia, Soria y Valladolit.

Catalunya: Barcelona, Chirona, Leida y Tarragona.

Extremadura: Badajoz y Cáceres.

Galicia: A Coruña, Lugo, Ourense y Pontevedra.

Rechión de Leyón: Leyón, Salamanca y Zamora.

Rechión de Murcia: Albacet y Murcia.

Navarra: Navarra.

Valencia: Alicant, Castellón y Valencia.

O modelo preso por Javier de Burgos yeran os departamentos franceses y, a tamas que muitas d'as decisions sobre limites y adscripcions provincials podesen aparentar-se arbitrarias (d'alcuerdo con criterios historicos y cheograficos), no en fuese mai tanto, pus seguiban cualques criterios racionals: extensión (dende o puesto mas aluenyau d'a provincia enta la suya capital no podeba tardar-se mas d'un día con es medios de transporte d'aquella epoca), demografía (as provincias teneban que tener entre 100.000 y 400.000 habitants) y coherencia cheografica. A o frent d'a provincia, o gubierno d'o país designaría un representant, que lievaría o titol de chefe politico.

Con ista división, se recuperan os nombres tradicionals d'as provincias d'o País Basco y Navarra, pero tamién se fan menos concesions a la historia porque i persiste mui pocos enclaus. Os mas importants d'ixes son: o Rincón d'Ademuz (provincia de Valencia) y o Condau de Treviño (provincia de Burgos).

Ista división territorial se consolida y triunfa a-escape, dica a plegar-nos en os nuestros días, pus inmediatament se dotó a las capitals de provincias de as institucions de gubierno principals, tot creyando-se a la vegada os Chefes Politicos (os futuros gobernadors civils, actuals delegaus de Gubierno). Antimás, a división provincial estará o calcil a on se refirmen todas as ramas de l'Administración publica y as suyas futuras divisions; por eixemplo: toz os achuntamientos y os suyos termins municipals han de trobar-se integrament adintro d'una provincia. Poco dimpuesas serían perfectament delimitadas todas as provincias, con os enclaus correspondients.

Sotzdivisions posteriors

En 1834 se creyó una nueva división d'o territorio chudicial: os partius chudicials, que suposaban una sotzdivisión d'as provincias partindo d'os limites que con ellas s'heba establiu. En ixes partius chudicials se i fncón os chuzgaus de primera instancia y os chuzgaus d'instrucción, que mas tarde estarían a base ta os districtos electorals y de contribución.

En 1834 tamién se definiría la forma y estructura administrativa que caleba que tenesen os municipios, dando naiximiento a os achuntamientos como los conoixemos en l'actualidat.