Clado

De Biquipedia
Ir a la navegación Ir a la búsqueda
Un cladograma. Representación grafica d'a diverchencia evolutiva de tres clados emparentaus (A, B y C) de plantas.

Un clado (d'o griego κλάδος, «kládos», rama) ye como se diz en biolochía sistematica y especialment en cladistica un grupo d'organismos que s'obtiene fendo un solo corte en un árbol filochenetico. O clado incluye un antipasau común y totz os suyos descendients, a diferencia d'un taxon, y forma una sola rama u una branca de l'árbol d'a vida. Ixe antipasau común puede estar un individuo, una población, una especie, y no importa si ye existent u extincto.

A evolución ye un procés que tiende a la diverchencia, por a qual cosa dos organismos siempre dimanan d'un antipasau común, no importa si ye antes u dimpués. Partindo d'ixa consideración, o ideal ye clasificar os sers vivos seguntes o suyo grau d'emparentamiento. En a representación grafica d'os clados, o dito cladograma, se representa chuntos a os clados que tienen un antipasau común más amanau.

Os clados son o resultau d'o estudeo d'as relacions de parentesco evolutivo entre as diferents especies en o tiempo, que se diz analís filochenetico. En os árbols filocheneticos se representa tot lo que se sabe d'a historia evolutiva d'os organismos que i amaneix.

Clado y taxón[editar | editar código]

Diferencia entre clados (izquierda) y taxons (dreita), representada graficament sobre un árbol d'a vida u cladograma. Os clados incluyen siempre l'antipasau común, por o que rancan d'un nodo u anastomosis que tamién ye adintro d'o clado, mientres que en os taxons ixo no ye necesario.

A definición d'un taxón que dimana d'os Codigos Internacionals de Nomenclatura, feitos por a taxonomía cheneral y que reglamentan os nombres scientificos de sers vivos, diz que ye "un grupo d'organismos con circumscripción, posición y libel".

A circumscripción ye a delimitación como conchunto, o criterio que s'emplega pa desesparar cada organismo d'ixe taxon contra os de demés táxons. A circumscripción se concibe pa que sía ubierta a nuevas incorporacions d'organismos en o taxon, quan sía que ixas se describan. Ixo quiere dicir que en realidat a circumscripción estableix un criterio diagnostico. A posición son os taxons adintro d'os quals o taxon se troba quaternau (s'ha de recordar que os taxons siguen una ordenación hierarquica), y o libel fa referencia a la categoría taxonomica.

Seguntes ixes mesmos Codigos o taxón no concabe antipasaus hipoteticos, solament os organismos adintro suyo a partir d'os quals se fizo la suya descripción, pero que en un caso extremo podría estar nomás que uno.

Tampoco no puede dicir-se que un taxón se corresponda siempre con un clado. I hai investigadors en taxonomía que consideran chustificable a esxistencia de taxons parafileticos, mientres que os clados son necesariament monofileticos y en un sistema de clasificación cladistica no s'admitiriba si que grupos monofileticos. Por ixa razón, os sistemas taxonomicos clasicos y os cladisticos son muit rarament superposables.

Se veiga tamién[editar | editar código]