Carioferina
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
As carioferinas (d'o griego Karion, «nuclio», y de l'anglés transfer, «transferencia», en o sentido de «transferideras d'o nuclio») son un grupo de proteínas implicadas en o transporte de moleculas a traviés d'a envoltura nucleyar. Se diz que actúan como importinas quan importan moleculas dende o citoplasma enta o nuclio y que actúan como exportinas quan el fan a la contra. Bellas proteínas miembros d'iste grupo funcional se muestran capables ta realizar as dos funcions, altras no en pueden fer si que una, estando importinas plenas, u exportinas plenas. as carioferinas fan parte d'a superfamilia d'a importina β, en a qual se i concaben proteínas que manifiestan semellanzas estructurals importants.
As carioferinas son capables ta ligar-se de manera transitoria con as nucleoporinas, en participando en o transporte de moleculas (de regular, RNAs u altras proteínas) a traviés d'o complexo de poro nucleyar. Quan treballan como importinas, en l'interior d'o nuclio liberan a suya carga y se'n tornan ta lo citoplasma, en do pueden tornar a ligar altras moleculas transportables. Lo caso con funcionamiento millor descrito en as carioferinas ye el d'a carioferina β y carioferina α que chuntas dan lugar a una vía de transporte dita vía d'as carioferinas α y β.