Basilio Boggiero Spotorno

De Biquipedia
Ir a la navegación Ir a la búsqueda
Basilio Boggiero Spotorno
Información personal
Calendata de naixencia 5 d'abril de 1752
Puesto de naixencia Flag of Genoa.svg Celle (Republica de Chenova, hue provincia de Savona en Italia)
Calendata de muerte 22 de febrero de 1809
Puesto de muerte Siñal d'Aragón.svg Zaragoza (comarca de Zaragoza, Aragón)
Ocupación Relichioso
Obelisco en o Puent de Piedra en memoria de Sas y Boggiero.

Basilio Boggiero Spotorno, naixito de Celle (Republica de Chenova, hue provincia de Savona en Italia) o 5 d'abril de 1752 y asasinato por os franceses en Zaragoza (comarca de Zaragoza, Aragón) o 22 de febrero de 1809, estió un relichioso italián, heroe d'os Setios de Zaragoza mientres a Guerra d'o Francés, en a esfensa d'a capital aragonesa contra os invasors d'o Exercito francés.

Chirmán d'un melitar chenovés enrolato en o exercito espanyol, plegó de nino a la ciudat de Zaragoza, con a finalidat d'estar ell también melitar. Sindembargo, quan teneba 16 ayadas dentró en as Escuelas Pías de Zaragoza, esdevenindo mosén en a orden d'os Escolapios dimpués de rematar os suyos estudeos en Daroca.

Estió preceptor en a familia Palafox, a on educó a un choven José y a os suyos chirmans Luis y Francisco. Asinas, quan en os alazetz d'a Guerra d'o Francés José de Palafox y Melci plegó en Zaragoza ta devantar a ciudat contra os invasors franceses, Basilio Boggiero Spotorno esdevenió o suyo consellero y tenendo asinas una gran influencia en a forma en que Palafox portava a esfensa d'a ciudat, mesmo que en a voluntat de resistencia d'os suyos ciudadans frent a l'invasor. Por as noticias d'os mercenarios suizos que albandonaban a ciudat os franceses conoixioron a importancia d'o pai Basilio en a luita contra ells, y dimpués d'a conquiesta d'a ciudat en febrero de 1809 o cheneral francés Lannes no respetó as clausulas sinyatas t'a rendición d'a ciudat, y asinas Santiago Sas y Casayau y o pai Basilio Boggiero Spotorno fuoron asasinatos a bayonetazos en o Puent de Piedra por soldatos franceses o 22 de febrero,[1] y os suyos cuerpos chitatos a o río Ebro.[2]

Antiparte, tamién tenió en vida una chicota fama como poeta; dimpués d'a suya muerte, en 1817, s'editoron en Madrit os suyos poemas.

Homenaches[editar | editar código]

En o Puent de Piedra hue bi ha un obelisco t'a suya memoria y t'a memoria de Santiago Sas y Casayau.

Obras[editar | editar código]

  • 1784: Elocuencia Española.
  • 1788: Vida del dominico de Alagón Padre Garcés.

Vinclos externos[editar | editar código]

Referencias[editar | editar código]