Arturo Pérez-Reverte

De Biquipedia
Ir ta: navego, busca
Arturo Pérez-Reverte
Pérez-Reverte, en 2008
Pérez-Reverte, en 2008
Información personal
Calendata de naixencia 25 de noviembre de 1951
Puesto de naixencia Cartachena (Rechión de Murcia, Espanya)
Ocupación escritor y periodista
Fillos Carlota Pérez-Reverte
Sitio web www.perezreverte.com

Arturo Pérez-Reverte Gutiérrez (25 de noviembre de 1951) ye un periodista y escritor espanyol, naixiu de Cartachena (Murcia). Ye conoixiu como periodista por haber estau reportero ta RTVE, cubrindo ta ixa televisión publica qualques conflictos armaus y guerras en os anyos 80 y 90, y como escritor, por estar un d'os autors de novela con más exito en Espanya en os zaguers anyos.

Dende 2003, ye miembro d'a Real Academia Española, a-on que i ocupa o sillón «T», que enantes heba ocupau o filologo Manuel Alvar entre 1974 y 2001. Ye l'autor d'a saga novelistica Las aventuras del capitán Alatriste, d'ambientación historica y grant éxito comercial. Qualques d'as suyas obras s'han adaptau a'l cine (d'entre ellas, mesmo as aventuras d'Alatriste).

Dende l'advenimiento d'as retes socials, ye un usuario activo y participa con freqüencia en debatz y intercambios de comentarios con lectors y publico cheneral. Conoixiu por as suyas opinions a-sobén polemicas, ha estau protagonista de bellas controversias en a rete Twitter, d'a-on que dimanan totz os comentarios suyos que dimpués s'ha reverberaus en belatras, como Facebook.

Biografía[editar | editar código]

Naixiu de Cartachena, a'l canto d'a Mar Mediterrania, ha expresau que teneba agüelos mariners[1]. A mar y o que se l'arredola tienen una firme presencia en buena cosa d'a suya obra, pues tamién fa parte d'a suya vida y a d'a suya familia. Ye un apasionau d'a mar, tiene un barco de vela, y su filla ye arqueologa marina[1]. Su muller ye aragonesa, natural de Tormos, en a comarca historica d'a Sotonera (actual comarca d'a Plana de Uesca).

Ye licenciau en Periodismo y estudeó tamién Sciencias Politicas. Principió a treballar en o diario «La Verdad», antes encara de rematar os estudeos, inicialment como reportero grafico.[2] Con iste medio fizo a suya primer salida ta l'extranchero, cubrindo a bordo d'un buque petroler a linia que uniba os puzos de Libia con a refinería d'Escombreras[2], en o termin municipal de Cartachena.

Como muitos periodistas novels en a decada de 1970, desembolicó a suya trachectoria profesional en o diario Pueblo (propiedat d'o Sindicato Vertical franquista), a-on que se formaría verdaderament como reportero de guerra. I treballó mientres 12 anyos, dica que o dito periodico clausuró en 1984[2].

Dende 1984 dica 1994 treballó en Televisión Española. En ixes anyos, espublicó as suyas primeras novelas: El húsar (1986), El maestro de esgrima (1988), La tabla de Flandes (1990), El club Dumas (1993) y La sombra del águila (1993).

A principios d'es anyos 90 presentó en Radio Nacional de España o programa La ley de la calle, que s'emitiba de nueitz y diba d'entrevistas con personaches de campos variaus, a-sobén marchinals. O programa fue clausurau por l'alavetz Director Cheneral d'RTVE, Jordi García Candau. Mientres l'anyo 1993, dirichió y presentó o programa Código Uno en TVE, d'o qual en dimitió en noviembre d'ixe mesmo anyo, por mor d'o tracto informativo que se l'heba dau a o suicidio d'una menor d'edat.[3] A-exprés d'aquell programa, manifestó que «conteneba basura»[3] y perteneceba a un chenero, o d'es programas de succesos, que son «dinamita pura, siempre en o limite, y, cabo ta quan, uno se puede pasar»[3]. A dirección de a cadena contradició a o presentador, alegando que a cancelación d'o espacio yera inminent porque se preparaba un codigo deontolochico interno que iba a refusar mantener programas de succesos,[3] en fendo entender que Pérez-Reverte simplament s'heba quiesto avanzar.

O periodista seguiría treballando ta la cadena publica estatal dica l'anyo siguient, tornando a fer de corresponsal de guerra, y espublicó Territorio comanche (1993), una novela pseudo-autobiografica basada en a suya experiencia como corresponsal en as guerras d'os Balcans en a qual s'includiba bellas criticas a la dirección de TVE y o grupo RTVE. Plegó de a fayena en abril de 1994, dimpués d'una escalada de disavenencias con a dirección d'RTVE que heba de rematar con o intento d'ubrir-le un expedient sancionador porque, seguntes s'aduciba, heba mirau d'unflar es gastos de corresponsal en presentando facturas falsas[4]. Pérez-Reverte consideró que o detonant d'ixas mesuras no yera sique as alusions feitas en Territorio comanche[4]. O documento ninviau a Ramón Colom remataba con a singular formula de despedida: «Que tos den morcilla, Ramón. A tú, y a Jordi García Candau.»[4].

En habendo plegau d'o periodismo, Pérez-Reverte se centró en a literatura. A novela La piel del tambor (1995) amaneixió a l'anyo siguient, estando a primera a-on que tuvo prou tiempo ta documentar-se como ell quereba, y dando asinas paso a una d'as facetas más desarrolladas por l'autor: a intensa documentación previa a la escritura. O escritor ha confesau que, ta belunas d'as suyas novelas (caso de La carta esférica -2000-) ha tardau a metat d'o tiempo de producir-las documentando-se, y l'atra metat en escribir-la[1]. A extensa documentación ye, por tanto, una faceta caracteristica de l'autor.

En 1996, amaneixió a primer entrega de Las aventuras del capitán Alatriste, con o títol de El capitán Alatriste. Iste primer numero ye sinyau entre l'autor y su filla Carlota y, seguntes s'ha explicau, fue una reacción a quan vido es libros d'escuela de a chiqueta, en os quals trobó que se i trataba de forma deficient o periodo d'o sieglo XVII. O personache que protagoniza la saga, un soldau y asesino a sueldo leyonés, vive y sufre as condicions d'os reinos peninsulars d'os Augsburgos en a decada de 1620, y ye a que l'ha dau o mayor numero d'exemplars vendius a l'autor.

Dende chunio de 1993, escribe una columna ta o suplemento dominical d'o diario El País, XLSemanal, propiedat d'o grupo Vocento. A columna se diz Patende de corso y ye conoixida por a suya polemicidat. Ha tractau sobre personaches de todas as índoles, y ha recibiu sonoras respuestas de qualquns d'os aludius. Seguntes o propio autor afirmó, en 1995; «Os míos achustes de cuentas semanals pueden calificar-se de qualsiquier cosa menos de comodos ta qui ahuespan»[5]. Una recopilación d'os textos de a dita columna semanal vido a luz como libro en 1998, baixo lo títol Patente de corso.

Obras[editar | editar código]

Narrativa[editar | editar código]

  1. El húsar (1986)
  2. El maestro de esgrima (1988), adaptau a'l cine por Pedro Olea en 1992.
  3. La tabla de Flandes (1990), adaptau a'l cine por Jim McBride en 1994.
  4. El club Dumas (1993), adaptau a'l cine por Roman Polanski en 1999 (baixo lo títol La novena puerta).
  5. La sombra del águila (1993)
  6. Territorio comanche (1993), adaptau a'l cine por Gerardo Herrero en 1997.
  7. Un asunto de honor (1995), adaptau a'l cine por Enrique Urbizu en 1995 (baixo lo títol de Cachito).
  8. La piel del tambor (1995), adaptau a serie de televisión en 2007.
  9. La carta esférica (2000), adaptau a'l cine por Imanol Uribe en 2007.
  10. La Reina del Sur (2002), adaptau a serie de televisión en 2011.
  11. Cabo Trafalgar (2005)
  12. El pintor de batallas (2006)
  13. Un día de cólera (2007)
  14. Ojos azules (2009)
  15. El asedio (2010)
  16. El tango de la guardia vieja (2012)
  17. El francotirador paciente (2013)
  18. Perros e hijos de perra (2014)
  19. Hombres buenos (2015)

Serie Las aventuras del capitán Alatriste[editar | editar código]

  1. El capitán Alatriste (1996)
  2. Limpieza de sangre (1997)
  3. El sol de Breda (1998)
  4. El oro del Rey (2000)
  5. El caballero del jubón amarillo (2003)
  6. Corsarios de Levante (2006)
  7. El puente de los asesinos (2011)

Recopilacions d'articlos[editar | editar código]

  1. Patente de corso, de 1993 dica 1998 (1998)
  2. Con ánimo de ofender, de 1998 dica 2001 (2001)
  3. No me cogeréis vivo, de 2001 dica 2005 (2005)
  4. Cuando éramos honrados mercenarios, de 2005 dica 2011 (2011)

Se veiga tamién[editar | editar código]

Referencias[editar | editar código]

  1. 1,0 1,1 1,2 (es) Aquí se hundió el Dei Gloria, consultau o 20 de septiembre de 2015.
  2. 2,0 2,1 2,2 (es) Los principios de Arturo Pérez-Reverte, en La Verdad, consultau o 20 de septiembre de 2015.
  3. 3,0 3,1 3,2 3,3 (es) Pérez-Reverte deja "Código Uno" porque "contiene basura", noticia en El País de 11/11/1993, consultau o 20 de septiembre de 2015.
  4. 4,0 4,1 4,2 (es) Carta al director de RTVE, documento de dimisión de Pérez-Reverte, consultau o 20 de septiembre de 2015.
  5. (es) PEREZ-REVERTE, Arturo. Patente de corso (1993-1998). Alfaguara. Madrid, 1998.

Vinclos externos[editar | editar código]