Hänsel y Gretel
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
| Hänsel y Gretel | |
|---|---|
 Ilustración d'o cuento. Obra d'Arthur Rackham, 1909 | |
Información cheneral
| |
| Autor | Cuento popular |
| Chenero literario | Cuento |
| Subchenero | Fadas |
| Versión en alemán | |
| Títol | Hänsel und Gretel |
| Autor | Chirmans Grimm |
| País |  Alemanya
|
| Calendata de publicación |
1812 |
Hänsel y Gretel[1] (en alemán /ˈhænsəl und ˈɡrɛtəl/) ye un cuento d'os Chirmans Grimm. En bellas edicions antigas, os nombres d'os chirmans Hänsel y Gretel se cambean por Pero y Margalida.
O cuento estió levau ta a opera por Engelbert Humperdinck en 1892 (con libreto en alemán de Adelheide Wette), estando a primera representación dirichida por Richard Strauss en el Hoftheater de Weimar en 1893.
Argumento d'o cuento
Hänsel y Gretel yeran os fillos d'un pobre fustero. Yeran una familia tan pobre que una nueit a madastra convenció a o pai ta dixar a os ninos en a selva albandonaus, ya que ya no teneban qué dar-les ta minchar.
Hänsel sintió isto, por o que marchó de casa a escar piedras con as que dimpués sinyaló un camín ta tornar ta casa mientres s'endrezaban ta a selva. en plegar ta a selva, sus pais los dixoron albandonaus en cuan yeran dormindo, pero malas que salió a luna aproveitoron a suya luz ta seguir o camín de pedretas que Hansel heba sinyalau y tornar ta casa suya. De maitíns, cuan i plegón, a suya madastra s'encarranyó de vier-los y decidió que a siguient vegada levarían a os ninos muito mas luent, enta una selva muito mas funda d'an que no i podesen salir. Hänsel, que atra vegada sintió a conversación de sus pais, miró de marchar a escar piedras ta fer de nuevo un camín por o que poder tornar-ie, pero no podió porque a puerta yera trancada con clau.
En o maitín en o que marchoron t'o bosque, Hansel trigó como traza de sinyalar o camín chitar migas de pan ta a tierra por a que iban pasando. Pero ista vegada, cuan salió a luna y tenioron luz ta veyer as migas, no troboron cosa, porque os muixons se las heban minchadas.
Pasoron dos días perdius por a selva mirando de tornar-ie, y cuan ya no sabeban qué mas fer, os ninos s'aturoron t'ascuitar o canto d'un muixón blanco. Ascape pensoron que les podeba levar enta bel puesto que les fese honra como cado. Asinas, plegoron dica una caseta feita de cocas, lamíns y a-saber-las atras cosas dulces. Hänsel y Gretel prencipioron a minchar sin parar cuenta de que ixa caseta en realidat yera la trampa d'una viella bruixa ta pillar-los, engarcholar-los y a la fin minchar-se-los.
Asinas, cuan dentrón en a caseta, a bruxa los engarcholó y prencipió a meter-es muita birolla ta que se metesen bien recios. Ta parar cuenta d'o que os ninos s'iban enreciando, a bruixa feba que Hänsel l'amostrase toz os maitins o dido d'entre os barroz d'a garchola. Pero o nino,que yera prou espiguardau, l'amostraba un hueso de pirín que heba alzau en una d'as chentas.
Farta d'asperar a que enreciasen os ninos, a la fin a bruixa decidió de minchar-se a Hänsel, y ninvió a Gretel a que parase o furno ta prencipiar a guisar-lo. Manimenos a nina, que tamién yera prou pispotera, embolicó a la bruixa ta que s'amanase ta o furno y aproveitó ta chitar-la dentro d'un empentón. A zagala trancó ascape o furno y a bruixa s'amortó a l'inte.
Ya libres, os chirmans replegón d'a casa todas as alfallas que a viella bruixa teneba alzadas y marchón ta casa suya. En plegar se troboron con su pai, que a suya muller se yera amortada. D'ista traza, a suya vida cambeó, y dende allora nunca no tornón a pasar fambre, vivindo chuntos y goyosos ta cutio.
Referencias
- ↑ A vegadas s'aragonesiza como Hansel y Gretel