Trobaire

De Biquipedia
Ir ta: navego, busca
Un trobaire.

Un trobaire u trobador ye un poeta cantaire d'a Edat meya que creyaba composicions literarias y musicals, destinatas a estar esparditas por o canto d'os chuglars. Manimenos, a parola poeta yera destinata a aquellas personas que escribiban literatura en luenga latina, ye decir, os clerigos. O termin "trobaire" especifica aquell "poeta" que escribiba en luenga vulgar. O trobaire ye una persona culta, que sabe de musica, de retorica, de lirica, ye decir, que perteneixe a la nobleza, u que, a o menos, ha aprendito istas tecnicas, y que escribe as poesías en luenga vulgar ta que sian trasmesas oralment. Cal remerar que a población en aquella epoca yera analfabeta y toda ista literatura heba d'estar recitata y escrita en a luenga d'o pueblo y, no pas en latín. Os trobaires por un regular cantaban en occitán, pero ista luenga yera artificial, yera una luenga alto u baixo unificata por parti d'os trobaires (una koiné). Asobén i teneba mas presencia o dialecto lenguadocián, pero estió en primeras o Lemosín o centro más important d'a cultura trobairesca.

Ista "koiné", a tamas d'a suya "uniformidat", presenta bellas variacions de parolas en os diferents trobaires. Isto se debe a la manca d'una gramatica bien estructurada en tot o territorio de parla occitana. D'atra man, como s'ha dito, ista "koiné" yera artificial, no corresponde con dengún d'os dialectos, que ya existiban, pero con menos diferencias que hue, de traza que se podría afirmar que ista "civilización cortesana" se restrinchiba, nomás, a la chent d'a nobleza, a os aristocratas, u bien aquellas personas que, por os motivos que sían, aprendioron as tecnicas trobairescas y teneban o rango de trobaire.

Os suyos poemas no yeren ta estar leyitos, sino ascuitatos. A población, o pueblo, os sirvients, etc., ye decir, a clase baixa, yera de tot analfabeta, asinas que a unica traza que teneban ta entender a poesía, a literatura culta, yera a traviés d'o recital d'os chuglars, uns personaches, por un regular malabaristas, acrobatas que, por meyo d'actividats de circo u muestras con bestias ya amayestratas u qualsiquier atro espectaclo, feban o recital d'os poemas. Asobén, cada trobaire teneba o suyo propio chuglar que amostraba as suyas creyacions.