Tractato de París (1856)

De Biquipedia
Ir ta: navego, busca
Iste articlo ye sobre o Tractato sinyato en París o 30 de marzo de 1856, rematando a Guerra de Crimea; ta atros usos, se veiga Tractato de París.
Deliberacions d'o Tractato de París de 1856.

O Tractato de París ye un tractato internacional sinyato en París o 30 de marzo de 1856 entre o Imperio ruso, d'una man, y d'atra man Reino Unito, Francia, o Reino de Cerdenya-Piemont y o Imperio Otomán, ta rematar a Guerra de Crimea entre ixas nacions.

Clausulas sobre a mar Negra[editar | editar código]

Seguntes o Tractato, a mar Negra esdeveniba un territorio maritimo neutral, a on no se permitiba a presencia d'armatas de qualsiquier país, ni a construcción de fortificacions melitars a o suyo canto. Os prencipatos de Moldavia y Vlaquia, encara que continaban en mans d'o Imperio Otomán, teneban mas autonomía dica esdevenir quasi independients, estando controlatas por as potencias sinyatarias d'o Tractato, con posibilidat de convocar un referendum ta la suya unificación (á mas, Moldavia recibiba parte d'a Besarabia). Os rusos perdeban asinas influencia en as comunidatz cristianas ortodoxas d'o Imperio Otomán, dixando d'estar consideratos os suyos protectors naturals, como miraba de fer o paneslavismo.

Clausulas sobre a mar Baltica[editar | editar código]

En a mar Baltica, as islas Åland, que feban parte d'o Gran Ducato de Finlandia (ocupato por o Imperio ruso), tamién esdeveniban territorio desmilitarizato, ubrindo asinas o golfo de Finlandia a un posible ataque contra Rusia.

A Comisión d'o Danubio[editar | editar código]

O Tractato establió a libre navegación por o río Danubio, establindo-se a Comisión d'o Danubio, que estió a primera organización internacional y que ye l'alazet d'o Dreito Internacional.

Declaración complementaria de Dreito maritimo[editar | editar código]

Antiparte, Francia y o Reino Unito sinyoron una declaración común sobre quantas qüestions de Dreito maritimo, conseqüencia d'os alcuerdos que heban sinyato ta la Guerra de Crimea, y seguntes a qüala:

  • Yera prohibita a patente de corso ta apoderar-se de biens propiedat de civils nacionals d'un estato en guerra y fer-ne botín (en actos prou amanatos a la piratería).
  • Yera prohibito apoderar-se se biens propiedat de belicherants en barcos neutrals y tamién de biens propiedat de neutrals en barcos belicherants.
  • Tamién bi heban bellas clausulas relativas a o bloqueyo maritimo en caso de guerra.

Encara que ista declaración yera nomás un alcuerdo bilateral, quantos países s'adibioron a las suyas clausulas, esdevenindo dimpués un autentico tractato internacional multilateral. A suya primera aplicación practica estió poco dimpués, en prencipiar a Guerra Civil estatounitense.

Dentrada en vigor[editar | editar código]

O tractato dentró en vigor o 16 d'abril de 1856.

Vinclos externos[editar | editar código]