SIDA
-
Advertencia: Biquipedia no ye un consultorio medico.
- Si creye que aprecisa d'aduya, por favor consulte con un profesional d'a salut.
A Sindrome d'inmunodeficiencia adquiesta, més conoixita per o suyo acronimo SIDA, AIDS en anglés, ye o nombre que se le da a un conchunto de sintomas (sindrome) que siguen a la destrución de linfocitos T CD4+, celulas d'o sistema inmunitario por un retrovirus. En l'Hombre, o virus responsable d'ista sindrome ye o virus d'inmunodeficiencia humana (VIH). Encara que ye común decir que a SIDA ye una malotía, o más propio ye charrar d'una sindrome. A SIDA ye o zaguer trango d'a infección por iste virus, y remata por a muerte de l'organismo por as clamatas malotías oportunistas.
As tres trazas de transmisión conoixitas son:
- por vía sexual, que ye a prencipal y a millor protección ye o preservativo.
- por vía sanguinia, que afecta especialment a os usuarios de drogas inchectables, os hemofilicos, os transfundidos y os profesionals d'a salut.
- de mai a fillo, que puede escaicer in utero en as zagueras semanas d'a emprenyadura, a l'inte d'o libramiento y en a tetadura.
Actualment no existe garra vacuna que pueda amortar o virus y os tractamientos antivirals disponibles, encara que efectivas, no premiten a cura. Sólo fan que enlentir a proliferación d'o VIH en l'organismo, prolargando l'aparición d'a SIDA. Istos tractamientos han achiquito a mortalidat y a morbilidat d'a infección por VIH, habendo feito d'ista infección quasi una malotía cronica, encara que tamién han surtito bells problemas ligatos con o tractamiento.
Manimenos, ista situación previlechiata d'acceso a os tractamientos nomás se preduz en os países desembolicatos que pueden pagar istos tractamientos. En os países en vías de desembolique, más d'o 95% d'os afectaus no pueden acceder a garra tractamiento efectivo. Por ixo a ONU ha feito d'a luita contra a SIDA una d'as suyas prioridatz.
[editar] Vinclos externos
