Pasato perfecto fuerte en aragonés

Verbos irregulars en aragonés

Verbos irregulars por diftongación d'a radiz

Rematatos en -iar (no freqüentativos) Rematatos en -eyar > -iar (freqüentativos) Rematatos en -enyer u -enyir Rematatos en -yer Rematatos en -yir Rematatos en -uir Rematatos en -ducir

Participios fuertes Pasatos perfectos fuertes

O pasato perfecto fuerte en l'aragonés se troba en bells verbos irregulars como herencio d'o tema de perfecto en o verbo latín d'o que provienen y presentan l'accentuación en a radiz en cuenta d'en a desinencia. Son usuals en l'aragonés d'o semontano (aragonés meridional) y d'o Prepireneu (transición entre l'aragonés meridional y os dialectos de cada val. Tamién yeran os usuals en l'aragonés meyeval y a literatura alchamiata.

Verbos que presentan pasatos perfectos fuertes en l'aragonés actual son: haber, decir, fer, poder, querer, tener, trayer, veyer, fer y atros.

Os pasatos perfectos fuertes en l'aragonés representan un problema d'interpretación, car en as vals d'o Pireneu Axial, on se charran as parlas aragonesas més arcaizants y millor conservatas no se fan servir y son as formas febles derivatas con regularidat d'o infinitivo as formas usuals.

Ye posible que en aragonés existise una tendencia a fer regulars estos pasatos pero que a interferencia con o castellán, on se mantienen bien os pasatos fuertes d'os verbos irregulars, fese que no rematasen por desapareixer como en as vals d'o Pireneu Axial. O feito que os pasatos fuertes con -x- sigan castellanizatos con -j- velar castellana refirmaría este punto de vista.

En a literatura alchamiata y en o castellán d'Aragón se produce o curioso efecto que o cherundio se construye a partir d'a radiz d'o pasato perfecto fuerte: quisiendo, dixendo, ficiendo, (dijendo, hiciendo en castellán d'Aragón), ecetra.

Presona	Pasato perfecto fuerte	Pasato perfecto feble
1ª Sing.	Tuve	Tenié
2ª Sing.	Tuves	Teniés
3ª Sing.	Tuvo	Tenió
1ª Plur.	Tuvemos	Teniemos
2ª Plur.	Túvetz	Tenietz
3ª Plur.	Tubon	Tenio(ro)n

Pasatos fuertes con -x-

Beluns d'estos verbos irregulars como trayer, decir y os rematatos en ducir presentaban os pasatos perfectos fuertes con una -x- intervocalica en aragonés meyeval (ell dixo), y actualment presentan o fonema velar d'a -j- castellana, que en a grafía actual de l'aragonés se representa como una -h-: tú trúhes, tú díhes.

Os verbos irregulars rematatos en -ducir presentaban pasatos perfectos fuertes en aragonés meyeval tipo: yo aduxe, ell aduxo.

Pasatos fuertes con -u-

Muitos d'estos verbos irregulars presentan una -u- en o pasato fuerte:

• Haber: yo hube
• Poder: yo pude
• Tener: yo tuve
• Trayer: yo truhe (castellanización de yo truxe)

Pasatos fuertes con -i-

Bells verbos irregulars con pasatos fuertes presentan una -i-:

• Decir: yo dihe (castellanización de yo dixe)
• Fer: yo fice
• Querer: yo quise
• Venir: yo vine
• Veyer: yo vide