Obesidat

Una muller obesa.

A obesidat ye a condición d'o cuerpo en a quala la cantidat de grasa acumulata tien un riesgo ta la salut, reducindo a esperanza de vida d'o individuo. A lo largo d'a historia la delimitación d'o concepto d'obesidat ha ito cambeyando: bellas culturas y relichions la consideraban como un signo de riqueza y felicidat y no la teneban como una amenaza ta la salut.

D'atra man bellas poblacions humanas, como por eixemplo los polinesios, tienen gran propensión a la obesidat mientres que en atras como la chinesa quasi no en tienen.

A cultura recient d'os países occidentals ha presentato como modelo más deseyable a fegura delgada y iste concepto s'ha difundito amplament en totas as artes y a publicidat, provocando uns efectos psicolochicos adversos en as presonas con sobrepeso u obesos. Han apareixito asociacions d'obesos que han reaccionato contra lo que consideran una presión contra la suya condición y reivindican a normalidat d'a obesidat.

A incidencia d'o sobrepeso y a obesidat sobre a población mundial ha rechistrato un gran aumento a partir d'a decada de 1980 y se considera, por eixemplo en os Estatos Unitos, como lo periglo más grieu ta la salut d'os ciudadans.