Diabetis mellitus

Advertencia: Biquipedia no ye un consultorio medico.

Si creye que aprecisa d'aduya, por favor consulte con un profesional d'a salut.

O cerclo azul ye o simbolo que fan servir as Nacions Unitas ta la diabetis.

A diabetis mellitus u diabetis sacarina, a sobén dita simplament diabetis (d'o griego antigo: διαβήτης, "compás"), ye un sindrome de metabolismo alterato, debito cheneralment a una combinación de causas hereditarias y ambientals, que resulta en un ran de zucre en a sangre anormalment alto (hiperglucemia). O ran de glucosa en a sangre ye controlato por una interacción complexa de numerosas sustancias y hormonas d'o cuerpo, incluyindo-ie a hormona insulina, fabricata en as celulas beta d'o pancrias. "Diabetes mellitus" se referiere a un grupo de malautías que prevocan un ran alto de glucosa en a sangre debito a defectos d'a secreción d'a insulina u de l'acción d'ista hormona en o cuerpo.

A diabetis mellitus de tipo 1 se produce a causa d'una produción redueita d'insulina, mientres que a diabetis mellitus de tipo 2 y a diabetis chestazional se deben a una resistencia a los suyos efectos. As dos causas prevocan hiperglucemia, que ye a responsable prencipal d'os signos agutos d'a diabetis: una producción excesiva d'orina, más sete y un aumento d'a inchestión de liquidos ta compensar, visión borrosa, perduga de peso sin de motivo aparent, letarchia y cambeyos en o metabolismo d'a enerchía.

O Día Mundial d'a Diabetis se celebra o 14 de noviembre.