Moisés
De Biquipedia
Moisés (en ebreu מֹשֶׁה Móše, en arabe موسى Musa), fillo d'Amram e Joquebed, estió un presonache biblico que, seguntes o libro d'o Ecsodo, liberó á lo pueblo chodigo d'a opresión á la que yera chusmeso por Echipto. Dió seguntes o mesmo relato a tabla d'as lais de Dios á lo suyo pueblo. A suya istoria se sitúa entre o sieglo XVIII aC e o sieglo XIII aC.
Contenius |
[editar] A suya biografía seguntes a Biblia
[editar] Naxenzia y salbazión d'as auguas d'o Nilo
Seguntes diz a Biblia, Moisés era fillo d'Amram e Joquebed, una muller chodiga que pertenexeba á la tribu de Leví. Cuan Moisés naxió, o faraón echipzián eba promulgato un edito seguntes o cual teneba que fer-se una mortalera con toz os ninos chodigos. Asinas, cuan Moisés teneba tres meses, en beyendo que no podeban amagar-lo más, a suya mai dezidió meter-lo en una zesta y dixar-lo confiato á las auguas d'o río Nilo.
A chirmana de Moisés, Miriam, cosiraba a zesta dende a marguin d'o río, y beyó que, de mientras se bañaba en o río, a filla d'o faraón eba escuitato plorar á Moisés. A filla d'o faraón dezidió adotar á Moisés como á lo suyo fillo.
Luego, Miriam, a chirmana de Moisés, fue á la filla d'o faraón e se li oferió ta portar á o nin á una muller chodiga ta que ista li donés a suya leit. Asinas, Moisés tornó á la suya autentica mai, que estió qui en fazió a suya educazión dica que Moisés crezió y tornó á o palazio d'o faraón. Estió entonzes cuan a filla d'o faraón en fazió l'adozión formal, y lo batizó como Moisès, que sennifica sortito d'as auguas. Asinas, Moisés dentró á fer parte d'a familia reyal echipziana, y s'educó como un prinzipe de l'Antigo Echipto.
[editar] Esilio en Madian
Seguntes o Ecsodo, Moisés yera en unas obras que feban unos chodigos, que yeran chusmesos á los echipzians, cuan beyó que un echipzián maltrataba á un chodigo. Yera un lugar disierto, y Moisés mató á l'echipzián y apedacó o suyo cuerpo baxo l'arena. Luego, bellos chodigos li conozioron y deziban que yera un echipzián que eba muerto á un atro echipzián ta esfender á un chodigo. Moisés se xorrontó y albandonó Echipto ta no ser acusato por a Chustizia echipziana.
Moisés plegó á un pozo d'os madianitas, á on esfendió a dos mozetas que discutiban con uns pastors. Dimpués d'a suya aduya, o pai d'as chicotas, o sazerdot Chetro combidó á Moisès á la suya casa, y li donó por esposa a suya filla mayor, Sipora, con qui Moisés tenió á lo suyo fillo Gerson.
Muitas añadas dimpués, cuan Moisés teneba 80 años y feba de pastor con as güellas d'o suyo suegro, beyó una esbarzera que cremaba sin consumir-se. Escuitó una boz que li deziba: Yo soy o Dios d'o tuyo pai, o Dios d'Abraham, o Dios d'Isaac y o Dios de Chacob. Luego, Dios li encomanó a misión de liberar á los chodigos d'as mans d'o faraón y d'os echipzians.
