Mitolochía griega

De Biquipedia
Ir ta: navego, busca

A mitolochía griega ye o conchunto de mitos y leyendas perteneixients a os antigos griegos que tractan d'os suyos dioses y herois, a naturaleza d'o mundo y os orichens y significau d'os suyos propios cultos y practicas rituals. Feban parte d'a relichión de l'Antiga Grecia.

A mitolochía griega amaneixe explicitament en una ampla colección de relatos y implicitament en artes figurativas, como ceramica pintada. Os mitos griegos intentan explicar os orichens d'o mundo y charran d'as vidas y aventuras d'una gran variedat de dioses, herois y atras creyaturas mitolochicas. Istos relatos fuoron orichinalment difundius en una tradición poetica oral, encara que actualment os mitos se conoixen mas que mas gracias a la literatura griega.

As fuents literarias mas antigas conoixidas, os poemas epicos d'a Iliada y a Odisea, se centran en os succesos arredol d'a Guerra de Troya. Dos poemas d'o quasi contemporanio d'Homero, Hesíodo, a Teogonía y Os Treballos y os Días, contienen relatos sobre a chenesi d'o mundo, a succesión de gobernants divinos y epocas humanas y l'orichen d'as trachedias humanas. Tamién se conservoron mitos en os himnos homericos, en fragmentos de poesía epica d'o ciclo troyano, en poemas liricos, en as obras d'os dramaturgos d'o sieglo V aC, en escritos d'os investigadors y poetas d'o periodo helenistico y en textos d'a epoca d'o Imperio Román d'autors como Plutarco y Pausanias.