Louis Armstrong
| Louis Armstrong | ||
|---|---|---|
 |
||
| Información personal | ||
| Nombre | Louis Daniel Armstrong | |
| Embotada | Louis Armstrong | |
| Naixió | 4 d'agosto de 1901 Nueva Orleans (Loisiana, Estatos Unitos) |
|
| Murió | 6 de chulio de 1971 Nueva York (Nueva York, Estatos Unitos) |
|
| Información mosical | ||
| Orichen | ||
| Estilo | Jazz | |
| Ocupancia | ||
| Instrumentos | Voz y trompeta | |
| Tiempo | 1919 - 1969 | |
| Discograficas | ||
| Relacionato con | ||
| Pachina web | www.Satchmo.net | |
Louis Armstrong (Louis Daniel Armstrong), conoixito tamién con as embotadas de Satchmo [1] y Pops, naixito de Nueva Orleans (Loisiana, Estatos Unitos) o 4 d'agosto de 1901 y muerto en Nueva York (Nueva York, Estatos Unitos) o 6 de chulio de 1971, estió un cantaire y mosico (trompetista) de jazz estatounitense, que estió uno d'os alazetz d'a transformación d'o jazz en una mosica popular y conoixita internacionalment.
Louis Armstrong ganó a suya fama en a suya faceta de trompetista, pero tamién ganó dimpués una mereixita fama como cantaire, estando uno d'os mas influyents cantaires de jazz, con una voz funda y perfectament reconoixible. En zaguerías d'a suya carrera, en os anyos 1960, a suya influencia trescruzó mesmo as mugas d'o jazz con a mosica popular d'o suyo país, estando prou reconoixible en quantos cataires y mosicos de mosica pop d'ixas envueltas.
Contenius |
[editar] As suyas primeras anyadas
Louis Armstrong naixió en una familia pobre d'a ciudat de Nueva Orleans, en o estato de Loisiana, o 4 d'agosto de 1901. A suya infancia estió marcata por l'ausencia de su pai, William Armstrong, qui albandonó a familia quan Louis yera muit chicot. En creixer en un ambient y en un vico prou difícil, o choven Louis fue ninviato quantas vegatas a centros ta ninos de color albandonatos (Home for Colored Waifs), encara que no en estar albandonato, sino en razón de chicotz actos de delinqüencia. Estando internato en iste centro, aprendió a tocar o suyo primer instrumento mosical, un instrumento que pagó a familia Karnofsky, una familia d'orichen chodigo ruso que s'heba intresato por o choven Louis.
Dimpués, asistió a ormino a las actuacions d'as brass bands, mesmo que ascuitaba a sobén a los mosicos d'ixas envueltas, aprendendo asinas d'oyiu de mosicos como Bunk Johnson, Buddy Petit y mas que mas de Joe «King» Oliver, qui estió o suyo mentor, plegando mesmo a fer-ne d'o pai que Louis no heba conoixito. Tamién prencipió a tanyer en bellas brass bands en os barcos d'o río Mississippi, en o que estió t'a suya mosica equivalent a una "universidat" en a quala alazetó as suyas conoixencias mosicals. Asinas, quan Joe Oliver albandonó a ciudat de Nueva Orleans en 1919, Louis Armstrong lo substituyó en o suyo puesto en a orquesta de Kid Ory, que en ixe inte yera considerata como a milor orquesta de hot jazz de Nueva Orleans.
[editar] Os alazetz d'a suya carrera
En 1922, Louis Armstrong se tresladó enta a ciudat de Chicago, dimpués de recibir una invitación de Joe «King» Oliver ta dentrar a fer parte d' suya banda, dita Creole Jazz Band, que yera a banda de hot jazz con mas influencia en a ciudat de Chicago, que en ixas envueltas (primerías d'os anyos 1920) yera a ciudat capital d'o jazz. Asinas, en 1923 se facioron as primeras gravacions de Louis Armstrong, fendo parte d'a banda de Joe Oliver con a función de segundo trompetista; istas gravacions encluyen bells solos y tamién bellas improvisacions.
Louis Armstrong ya se contentaba con tanyer en a banda de Joe Oliver, pero a suya muller, a pianista Lil Hardin Armstrong, li deciba que li caleba treballar con atros artistas, como meyo ta amillorar a suya carrera artistica. Asinas, en 1924 Louis se deseparó de Joe Oliver (encara que continó mantenendo-ne l'amistat) y se treslado enta la ciudat de Nueva York ta tanyer en a orquestra de Fletcher Henderson, que yera en ixas envueltas una d'as collas mas conoixitas d'a mosica afro-americana. Tamién fació en ixe inte muitas gravacions, que li preparaba uno d'os suyos antigos amigos de Nueva Orleans, o pianista Clarence Williams, encluyendo-ie fragmentos ta orquestas de jazz (mesmo duos con Sidney Bechet, uno d'os pocos artistas que son a o suyo ran en quanto a tecnica mosical) y tamién bells acompanyamientos ta cantaires de blues.
En 1925 tornó enta Chicago y fació gravacions con o suyo nombre, como Louis Armstrong and the Hot Five y Louis Armstrong and the Hot Seven, con exitos como as suyas cantas Potato Head Blues, Muggles (que tractaba sobre a mariguana, un tema sobre o qualo Armstrong tenió intrés mientres toda a suya vida), West End Blues u Tight Like This; istas gravacions estioron un punto de referencia en o mundo d'o jazz mientres muitas anyadas, y a suya introducción de trompeta en West End Blues contina estando una d'as mas conoixitas improvisacions d'a historia d'o jazz.
[editar] Bibliografía
- Armstrong, Louis. Satchmo: My Life in New Orleans. ISBN 0-306-80276-7.
- Armstrong, Louis and Brothers, Thomas. Armstrong, in His Own Words: Selected Writings. ISBN 0-553-06768-0.
- Bergreen, Laurence. Louis Armstrong: An Extravagant Life. ISBN 0-553-06768-0.
- Cogswell, Michael. Armstrong: The Offstage Story. ISBN 1-888054-81-6.
- Meckna, Michael. Satchmo: The Louis Armstrong Encyclopedia. ISBN 0-313-30137-9.
- Elie, Lolis Eric. A Letter from New Orleans. Gourmet. Reeditado por Best Food Writing 2006, Holly Hughes. ISBN 1-56924-287-9.
- Jones, Max and Chilton, John. Louis Armstrong Story. ISBN 0-306-80324-0.
- Tirro, Frank. Historia del Jazz clásico. MaNonTroppo, 2001. ISBN 84-95601-12-5.
[editar] Referencias
- ↑ Acronimo de satchel-mouth.
[editar] Vinclos externos
Se veigan as imáchens de Commons sobre Louis Armstrong.- Satchmo.net, pachina web oficial d'a casa de Louis Armstrong.
