Hip hop
| Hip hop | |
|---|---|
| Orichens mosicals: | Funk, disco, soul, R&B, dub, scat, blues parlato |
| Orichens culturals: | Griot, Rapsoda, Africa |
| Instrumentos comuns: | Turntable, sintetizador, rapeo, caixa de ritmos, sampler, beatboxing, Hip hop drummers |
| Popularidat: | Dende a fin d'a decada d'os anyos 1970 en os Estatos Unitos y a nivel mundial en os anyos 1990, plegando a lo punto de mayor popularidat a prencipios d'os anyos 2000. |
|
|
|
| Breakdance – Graffiti - Categoría:Hip hop | |
O hip hop ye un movimiento cultural y un chenero mosical que apareixe a prencipios d'os años 1970 en as comunidatz hispanoamericanas y afroamericanas d'os vicos d'o Bronx, Queens y Brooklyn de Nueva York.
A concepción clasica d'o hip hop se centra en a existencia de quatre aspectos u "pilars" d'a cultura: o MCing (u rapping), o DJing (u turntablism), o Breakdancing (u BBoying), y o graffiti. Bi ha qui da la mesma importancia a atros pilars como lo beatboxing, l'activismo politico u o disenyo de ropa y complementos.
A unión de dos d'istos elementos, o MC (Master of Ceremony, en aragonés "Mayestro de ceremonias", prenunciato /em.'si/ u /'em.si/) y o DJ (Disc Jockey, prenunciato en aragonés /di.'ʝei/ u /'di.ʝei/), conforman o estilo mosical d'o hip hop: o rap. O rap, consiste en cantar u parlar parolas rimatas acompanyatas d'un ritmo repetitivo y sincopato. O estilo mosical que acompanya a lo MC ye una evolución d'o funk y o breakbeat, que tamién puet estar instrumental. A mosica hip hop se caracteriza por a suya ritmica y/u bailabilidat.
O turntablism u DJing ye l'arte de creyar mosica por meyo de tecnicas con discos de vinilo, como breakbeat, scratch, beat juggling, ecetra.
O BBoying ye l'arte de bailar o breakdance. A la presona que practica iste baile li se diz b boy, b girl, fly girl u breaker. Tamién li se diz b-boy/girl a la presona que sigue ista cultura.
O graffiti ye a prencipal expresión d'o hip hop en as artes plasticas. Consiste en pintar con pintura en aerosol sobre superficies urbanas como pueden estar muros de qualsiquier material, asinas como trens, puertas, mobiliario urbán y d'atros. O más común ye que os artistas adediquen as suyas obras a pintar o suyo nombre u sobrenombre. A estetica d'os graffitis ha influito en os cómics (como por eixemplo en The Boondocks) y en o disenyo de ropa, portaladas de discos, y atros obchectos.
O tag tien prou relación con l'arte d'o graffiti, os escritors que pintan as suyas obras en o mobiliario urbán gosan sinyar-las con un sinyal presonal, o dito tag, pero no siempre van unitos a la obra pintata, se pueden trobar personalizatos sin de relacionar-se con dengún graffiti por as carreras, acción dita taggeyar y, dimpués evolucionata a takeyar por a suya estreita relación con os rotuladors taker con que gosan fer-se istos sinyals.
O beatboxing ye a tecnica d'imitar con a boca sonitos de percusión u instrumentos propios d'a mosica rap u hip hop.
