Friuli

Localización de Friuli en un mapa administrativo d'Italia

Friuli (Friûl en furlán, Friul en venecián, Furlanija en eslovén, Friaul en alemán) ye una rechión historica d'o noreste d'Italia que comprende a més gran part d'a rechión autonoma de Friuli-Venecia Chulia, correspondendo a las provincias de Udin y Pordenone d'esta rechión autonoma sin arribar a incluir Trieste. Tamién incluye part d'as provincias de Gorizia y Venecia.

A capital historica y ciudat més important ye Udin, que tamién estió capital d'o Patriarcato d'Aquileya en a baixa Edat Meya. Atras ciudatz importants son Pordenone, Gorizia, Sacile, Codroipo, Cervignano del Friuli, Cividale del Friuli, Gemona del Friuli, Monfalcone, y Tolmezzo.

Os furlans son o grupo etnico caracteristico de Friuli. Tamién bi ha eslovens y italians etnicos.

Toponimia

O toponimo Friuli deriva de Forum Iuli nombre latín de l'actual ciudat Civitale del Friuli, que estió capital d'o ducato de Friuli, creyato por o rei Alboín, primer rei longobardo d'Italia.

A rechión de Friuli ye mencionata en a "Cronica de los Conquiridors", compilación historica de Chuan Ferrández d'Heredia:

Et ap(re)s passo Atilla con los hu(nc)nos por la p(ro)uincia clamada la ora foru(n) uilij / que agora es dicha Friuli / et destruyo las ciudades de treuisio et de padria et de uincencia et verona et otras marauellosas ciudades de ytalia por fierro et por fuego

A rechión de Friuli ye mencionata como Provincia Foro Julia, Foro Julio, Foro Julians, Foro Julianes, Foro Julianos y variants en a traducción herediana d'a versión de "Breviarium ab Urbe condita" de Pavlo Diacono, que incluye a "Historia Romana" y "Historia Langobardorum":

de aq(ue)sta venecia fue cabo la Ciudat de aq(ue)lla por la qual foro iulianes asi dicto car Julio Cesar constitui aqui mercado et for de mercaderia Et es bueno que toquen breument las otras prouincias de ytalia

Et aquesta fue la causa de grant perdicion de la prouincia foro Juliana algunos ladrons delos esclauos tomaron bestiar qui pacia en aquellas p(ar)tidas et se lo leuaron et batieron los pastores de las oueias