Extinción masiva d'o Permico-Triasico
A extinción masiva d'o Permico-Triasico (en aragonés se pronuncia "estinción"), a sobén tamién s'emplea «A Gran Mortandat» de traza informal, ye un evento d'extinción masiva d'organismos que i habió fa uns 250 millons d'anyos y que define o limite entre o periodo Permico y o Triasico.
Ha estau a mayor extinción que i ha habiu en a Historia d'a Tierra, en a cual s'acotoló arredol d'o 81% d'as especies marinas y cuasi o 70% d'os vertebraus terrestres.
As causas de mortalera semellant no se conoixen por seguro pero a ciencia tiene unas cuantas hipotesis, d'entre as cuals un vulcanismo excesivo, l'impacto d'un asteroide de mida gran y a liberación de gases d'efecto d'hibernadero enta l'atmosfera compiten por estar as mas consideradas.
A recuperación d'a biodiversidat a resultas d'ixa catastrofe fue a saber qué lenta en bels casos, tardando dica o Triasico Meyo (uns 10 millons d'anyos) a recuperar-se la vida en bel puesto. Tot, porque se tuvon que rediversificar a partir nomas que d'os taxons que heban sobreviviu. As faunas marinas quedón tan trastocadas que a nivel ecolochico se charra de «Faunas Evolutivas Modernas» pa fer a diferencia con as «Faunas Evolutivas Paleozoicas» que i habeba antes.