Dovinalla

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
A figa: "Una agüeleta currucadeta con os uesez en a tripeta".

Una dovinalla u devineta[1] (d'o latín addivināre) ye un chicot enigma escrito en forma de verso que gosa tener por un regular orichen popular y que tien bella dificultat semantica u de contenito.

As dovinallas se transmiten oralment y s'han feito servir dende fa sieglos como una forma ta entretener-se. O suyo orichen se creye que ye en Orient y tenió una gran popularidat en os sieglos XVIII y XIX en os que mesmo a burguesía miró sin d'exito de adoptar-la, fendo-la mas literaria. En Aragón tenió gran difusión en os sieglos XIX y XX.

Os temas que abracan no son guaire complexos, sino que por un regular son simples, superficials y en muitas ocasions con doble sentito, estando a vegadas ubiertament sexuals.[2] Se gosan decir prencipiando por a frase "Dovina dovinalla..." u "Devina devineta...", "Qué cosa ye..." u "Una cosa cosicada". As formulas mas habituals ta zarrar una dovinalla son "anque te tornes tocino...", "no lo dovinarás en un anyo...", "a dovinar sinyors..." u "qué ye?".

Exemplos[editar | modificar o codigo]

Son muitas as dovinallas que se pueden trobar en tot o dominio lingüistico aragonés. A vegadas trobamos a mesma dovinalla de dos formas diferents en distintos puestos d'a cheografía aragonesa:

O uevo
Astí alto en un tozal i hai un flaire motilón
que tiene la capa blanca y amarillo el corazón.
(Val de Chistau)
Allí alto a la montanya, i hai un frari motiló
que lleve els habitos bllancos y amarillo el corazón.
(Vall de Benás)

Atras vegadas existe mas d'una versión, que cambea seguntes o lugar, ta definir un mesmo termín:

A nuez
Cuatro monchetas en un convento
no han finestra ni ventanico.
(Val d'Echo)
Arca monarca de buen parecer
nengún carpintero la sabe fer.
(Tierra de Biescas)

Vinclos externos[editar | modificar o codigo]

Referencias[editar | modificar o codigo]

  1. Tamién se denominan (a)divinallas, endevinetas, endivinalla, (a)dovinetas u domenallas entre atras formas.
  2. (es) Chusé Raúl Usón: Dovina Dovinalla. Adivinanzas populares en aragonés. Larumbe Chicos, Zaragoza, 2009.