Vidrera
Una vidrera[1] (u vidriera[1]) u vitral[1] (d'o francés vitrail) ye una composición pictorica que combina vidres de colors unius por meyo de franchas u tiras de metal, mas que mas plomo. A o largo d'a suya historia milenaria, o termín s'ha aplicau cuasi exclusivament a las finestras d'as ilesias y atros edificios relichiosos. Encara que tradicionalment se fan en panels plans y se fan servir como finestras, as creyacions d'as vidreras modernas tamién incluyen estructuras y esculturas tridimensionals. L'uso vernaclo moderno a sobén ha estendillau o termín "vidrera" pa incluyir lampas domesticas y obchectos d'arte creyaus a partir de vidre d'aluminio exemplificau en as famosas lampas de Louis Comfort Tiffany.
Como material a vidrera ye o vidre que s'ha colorau adhibindo sals mientres a fabricación y, por un regular, dimpués s'ha decorau de cuantas maneras. O vidre de colors s'elabora en vidreras en as que se fican chicoz trozos de vidre pa formar patrons u cuadros, unius por tiras de plomo y rodiadas por un marco richido. Os detalles pintaus y a taca amariella se fan servir a sobén pa amillorar o disenyo. O termín vidrera tamién s'aplica a las finestras de vidre esmaltau en que as colors s'han pintau sobre o vidre y dimpués s'han fusionau a o vidre en un forno; muit a sobén ista tecnica nomás s'aplica a partis d'una finestra.[2]
A vidrera, como arte y oficio, requiere l'habilitat artistica pa concebir un disenyo adecuau, y as habilidaz d'incheniería pa montar a pieza. Una finestra ha d'encaixar perfectament en o espacio pa o que ye feita, ha de resistir o viento y a pluya, y tamién, mas que mas en as finestras mas grans, ha de suportar o suyo propio peso. Muitas finestras grans han resistiu a preba d'o tiemplo y s'han manteniu substancialment intactas dende a Baixa Edat Meya. En Europa occidental, chunto con os manuscritos ilustraus, constituyen a prencipal forma d'arte pictorico medieval. En iste contexto, o proposito d'una vidrera no ye permitir que os que se troben adintro d'un edificio veigan o mundo exterior u mesmo principalment admitir a luz, sino controlar-la. Por iste motivo, as vidreras s'han calificau de "decoracions de parez luminadas".
O disenyo d'una finestra puet estar abstracto u figurativo; puet incorporar narracions quitadas d'a Biblia, a historia u a literatura; pueden representar santos u patrons, u fer servir motivos simbolicos, en particular armorials. As finestras d'un edificio pueden estar tematicas, por eixemplo: adintro d'una ilesia: episodios d'a vida de Cristo; adintro d'un edificio d'o parlamento: escudos d'as circumscripcions electorals; adintro d'una sala universitaria: figuras que representen as artes y as ciencias; u adintro d'una casa: flora, fauna u paisache.
Seguntes l'Instituto nacional d'os oficios de l'arte (en frances Institut national des métiers d'art), Francia ye o país con a superficie de vidreras mas gran d'o mundo, lo que ye 90.000 m2 de vidreras.[3]
Referencias
[editar | modificar o codigo]- ↑ 1,0 1,1 1,2 (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
- ↑ (fr) Peinture sur verre au XIXe siècle: les secrets de cet art sont-ils retrouvés? Quelques réflexions sur ce sujet adressées aux savants et aux artistes. G. Bontemps. Impr. Ducessois, 1845
- ↑ (fr) Institut national des métiers d'art