Solido bizantín

De Biquipedia
Translate icon.svg Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.
Solido bizantín 
Solidus Julian-transparent.png
Solido de Chulián, sieglo IV
Información cheneral
Ambito: Flag of Palaeologus Emperor - Libro del conosçimiento de todos los rregnos.svg Imperio Romano d'Orient
Materials: Oro
Emisor: Imperio Romano d'Orient
Valors
Fraccions: semis = 1/2 solido
trient = 1/3 de solido
Equivalencias: 4,5 gramos d'oro

Lo solido bizantín estió una moneda d'oro creyata por l'emperador Costantín I lo Gran (272-337), recibe tamién lo nombre de nomisma y bezant. Las palabras sueldo y soldato provienen de lo latín SOLIDUS. Lo suyo peso ye de d'alto u baixo 4,5 gramos, con un diametro de 22 mm y una lei de fino u pureza de 0,900.

Lo solido tien dos fraccions: lo semis, equivalent a 1/2 solido, y lo trient, equivalent a 1/3 de solido. En latín lo plural de solido (solidus) ye solidii.

La parabra solidus la heba emplegata enantes Dioclecián (284-305) pa dicir la moneda d'oro que éll mesmo introdució y que yera diferenta de la que introduciría dimpués Constantín I. La moneda teneba una valura teorica de 1/72 de la libra romana (d'alto u baixo 4,5 g). Los solidii yeran más amplos y finos que l'aureu, fueras de bellas emisions de baixa calidat de l'Imperio Romano d'Orient. Tamién se producioron semissis (meyo solido) y tremissis (un tercio de solido).

Con la creyación de lo solido bizantín, Constantín I principió una reforma monetaria que permitió estabilizar la economía en l'Imperio Romano, que se trobaba en crisi, lo que consiguió, esdevenindo lo solido en la base de la economía de l'Imperio Romano d'Orient. Lo solido mantenió una valura costant en Occident dica lo sieglo IX, emplegando-se en Orient dica lo sieglo XI como moneda de cambeo en lo comercio internacional.

Lo suyo prestichio se basaba en la permanencia de lo suyo peso y la suya pureza.

Los primers solidos (solidii) levaban la imachen de l'emperador Constantín I en l'anverso u cara principal y bella alegoría pagana romana en lo reverso, que la cambeoron por una imachen de la cruz griega u un anchel dimpués de 313 (legalización de lo Cristianismo).

Quan reinaba l'emperador Chustinián II (685-695 y 705-711), las imachens de los emperadors las acunyaban en lo reverso, quedando una representación de Cristo en la cara principal.

Lo califa omeya Abd al-Malik ibn Marwan acunyó entre los anyos 691 y 692 una moneda dita dinar, que teneba las mesmas caracteristicas de pureza y peso de lo solido bizantín, agudizando la baralla politica, relichiosa y militar que i heba entre l'Imperio Bizantín y lo califato Omeya. Lo califa establió en l'anyo 697 que lo dinar levase marcatos versos de l'Alcorán en as dos caras.

La acunyación de lo solido la interrumpió l'emperador Aleixo Comneno (1081-1118), que la cambeó por atra de mayor pureza dita hyperpyron.

La parabra soldato deriva de solidus, fendo referencia a que a los soldatos lis se pagaba con solidos. La parabra Solidus tamién ye l'orichen de la parabra sueldo.