Sistema educativo en Finlandia

De Biquipedia
Ir a la navegación Ir a la búsqueda

O sistema educativo finlandés ye considerau como o millor d'os evaluaus por l'informe PISA de 2003. Dito sistema se divide en dos grans tipos de formacions a partir d'os 16 anyos: a formación teorica, que s'imparte en as escuelas segundarias superiors y as universidatz, y a formación profesional, que s'imparte en as escuelas profesionals.

Caracteristicas[editar | editar código]

O sistema educativo finlandés ye un sistema igualitario: a escolaridat ye obligatoria d'os 7 a os 16 anyos (os alumnos acuden a la escuela local). Ye gratuita a tiempo completo ta os estudiants y ista gratuidat incluye l'asistencia sanitaria y o minchador (con una chenta diaria que debe cubrir arredol d'un tercio d'as necesidatz nutricionals diarias de l'alumno) ta las escuelas primaria y segundaria.

En toda a escuela elemental (peruskoulu) de 7 a 16 anyos, totz os libros y materials escolars son gratuitos y daus por o mesmo centro. Os alumnos que viven luen d'a escuela - a mas de 5 km - pueden pedir o reembolso d'o coste d'o transporte. Os alumnos que tienen dificultatz d'aprendizache podendo tamién beneficiar-se, en o mesmo centro, de l'aduya d'un profesor especialista (eritysopettaja), que puet ir a clase ta guidar-lo u bien treballar con ell de traza deseparada.

A partir d'a enqüesta internacional PISA sobre os sistemas educativos d'a OCDE, Finlandia recibe regularment as millors calificacions a escala mundial. En 2003 os alumnos finlandeses de 15 anyos figuraban en o primer puesto d'o ranking mundial por lo que fa a competencias lingüisticas y scientificas, y se clasificoron en segunda posición por lo que fa a resolución de problemas. Por lo que fa a os estudios superiors, o Foro Economico Mundial (FEM) situó Finlandia primera en o ranking mundial por lo que fa a numero de matriclas y calidat, y en segundo puesto en l'amostranza d'as matematicas y as sciencias. En os estudios que se fan ta analisar os motivos d'istos buenos resultaus se meteba de relieu l'alto grau de responsabilidat d'os alumnos, l'ausencia d'estrés en un sistema an que no se puet repetir curso y a calidat d'a formación d'os docents.

Ye important considerar que os docents d'o sistema publico son trigaus dreitament por a directiva d'o centro educativo. Isto permite que cada centro pueda creyar os millors equipos de treballo y buscar a os profesors que millor encaixen en o suyo prochecto educativo real. Os fondos que recibe cada centro son proporcionals a o libel de calidat que istos ofreixen.

A reforma d'o sistema educativo finés[editar | editar código]

Dica primerias de l'anyo 1958, Finlandia teneba un sistema educativo elitista. Se feba una selección a la edat d'once anyos dimpués de nomás quatro anyos de primaria. Os millors alumnos podeban continar a escolaridat cheneral en primerías en un instituto (mientres 5 anyos) y dimpués, eventualment, con tres anyos en un instituto de bachillerato. A mayoría d'os ninos y ninas seguiban dos anyos suplementarios en a escuela primaria. Dica 1972, a lo menos a metat d'os alumnos no feban estudios segundarios. A mayor parte d'os fillos de familias modestas deixaban a escuela arredol d'os 13 u 14 anyos ta treballar u recibir una formación profesional.

En 1978, dimpués de veinte anyos de vacilación s'acometió la reforma d'o sistema educativo en Finlandia. S'abolió a selección a os 11 anyos. A partir d'alavez s'aculle totz os alumnos en as mesmas instalacions tanto en primaria como en segundaria y dica os 16 anyos y reciben a mesma amostranza elemental. A reforma se metió en practica progresivament seguntes as rechions: Laponia y o extremo norte en 1972, as rechions d'o nordeste en 1973, as d'o noroeste en 1974, as d'o sudeste en 1975, as d'o sud- ueste en 1976 y a rechión de Helsinki en 1977.

Ista progresividat permite estudiar de traza obchectiva os resultaus d'a reforma contimparando o futuro d'una edat tocada por a reforma y aquells d'a mesma edat no tocaus por a reforma educativa. Os analistas han puesto asinas plegar a la conclusión que a reforma ha suposau una reducción d'as desigualdatz en un 25%. Conviene, manimenos, precisar que a sociedat finlandesa, como todas as sociedatz nordicas contemporanias, ye mas igualitaria. As diferencias familiars tienen menos efecto en o futuro d'os ninos que en as sociedatz anglosaixonas an que las reformas de democratización d'a escuela no ha reduciu as desigualdatz socials.

Enlaces externos[editar | editar código]