Escepticismo

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Pirrón en una mar embravecita

A corrient sceptica u scepticismo (d'o griego σκέπτομαι, skeptomai) estió una corrient filosofica iniciata por Pirrón d'Elis (360 aC-270 aC). A primera forma d'scepticismo tradicionalment admesa estió o pirronismo. Os primers scepticos, amás d'scepticos u pirronicos, tamién se deciban con o nombre menos habitual de zeticos; iste zaguer termin significa "buscadors que buscan sin de trobar garra cosa".

Encara que bi ha posturas scepticas en muitos periodos d'a historia (dende a primera sofistica dica a postura radicalment critica de Nietzsche, y encara mas entabant), o movimiento conoixito popularment como scepticismo ye formato mas que mas por o suyo fundador Pirrón, por o suyo disciplo Timón, por os platonicos Arcesilau y Carneades y, sieglos dimpués, por Enesidemo y por Sexto Empirico (y atros miembros secundarios d'a escuela).

Os scepticos desconfiaban d'a capacidat d'a razón ta descubrir a verdat, ya que as sensacions ta as que se percibe a realidat nomás amostran l'apariencia d'as cosas.

As ideyas centrals d'o scepticismo son:

• No se pueden saber como son as cosas en si mesmas (como mazada, se'n pueden conoixer nomás "as apariencias" que se'n veyen), y lo mas prudent ye abstener-se de formular dengún chuicio, ya que garra cosa ye falsa ni verdadera.
• No se puet fiar-se d'a razón ya que os suyos conoiximientos se fundamentan en as sensacions.
• Querer plegar a conoiximientos absolutos ye una fuent d'intranquilidat. A epoché (abstención de chuicio, ye decir, d'opinión y de critica) ye o paso previo a la felicidat y a l'ataraxia.
• A unica cosa que intresa en a vida, como s'ha dito, ye aconseguir a tranquilidat d'esprito u ataraxia. En iste punto, o scepticismo tien puntos de contacto con o epicureismo y, encara que en menor mesura, con o estoicismo.
• Tot o externo a l'hombre ye indiferent.
• Debito a que s'ha de vivir en un mundo d'apariencias, siempre caldrá inclinar-se por o mas probable. (En iste punto, o sceptico Carneades fació una tabla de conoiximientos probables, a on que quereba dar a suya opinión sobre qué feitos tienen una mayor probabilidat, y quálos una probabilidat menor).

Cal decir, manimenos, que o scepticismo d'o primers scepticos tien poco u muit poco a veyer con o dito scepticismo muderno, u con o scepticismo que predican bells pensadors individuals (como por eixemplo David Hume). Tamién bi ha pensadors que practican un scepticismo moderato, u encluso un scepticismo que sirve de portal a d'atros conoiximientos dogmaticos; por eixemplo, Descartes u Kant.

Se veiga tamién

• Scepticismo scientifico
• Michel de Montaigne
• Pierre Charron

Vinclos externos

• (ca) Dosier sobre scepticismo en Grecia, con textos de Ramon Alcoberro