Proteína ligadera d'a Ran

De Biquipedia
Ir a la navegación Ir a la búsqueda
Modelo d'a proteína ligadera d'a Ran 1 (RanBP1).

As proteínas ligaderas d'a Ran (per siglas, RanBP, de l'anglés Ran binding protein, literalment «proteína ligadera d'a Ran» u «unidera d'a Ran») son una chicota familia funcional de proteínas, que anque inicialment se describioron como una sola proteína (anyos 90), en l'actualidat ya sen tiene identificadas qualques diferents, en as que ta diferenciar-las se les ye dido adhibiendo un numeral a lo suyo nombre y siglas conforme se las ye descobiertas. Enguán, se reconoixen plenament dos proteínas d'iste grupo: a proteína ligadera d'a Ran 1 (RanBP1) y a proteína ligadera d'a Ran 2 (RanBP2). En o ser humano, a proteína RanBP1 se troba codificada en o chen RanBP1.

As proteínas ligaderas d'a Ran, que se troban ligadas ellas mesmas en o costato citosolico d'o complexo de poro nucleyar, unen fuertement a proteína Ran en a suya forma conformacional RanGTP quan ista traviesa lo poro nucleyar, y cambean de conformación quan el fan. A suya acción, a la contra de como se gosaría pensar, no ye a hidrolisi d'o grupo GTP de RanGTP enta GDP, que daría RanGDP, si no que el que fan ye activar a función activadera de l'actividat GTPasa d'una tercera proteína, que ha nombre RanGAP (de l'anglés GTPase activating protein, «proteína activadera (de l'acción) GTPasa»). Son, per isto que diz, unas simplas meyaderas en l'activación de l'autocatalisis d'a proteína Ran. Ran ye autocatalitica, tiene función auto-GTPasa, pero cal activar-la, e ista ye a función que en realidat fa la RanGAP previa activación per partes d'una RanBP.

Se veiga tamién[editar | modificar o codigo]