Picueta loca

De Biquipedia
Ir a la navegación Ir a la búsqueda
Icono d'aviso medico
Advertencia: Biquipedia no ye un consultorio medico.
Si creye que aprecisa d'aduya, por favor consulte con un profesional d'a salut.
Un nino afectau per a picueta loca.

A picueta loca ye una malotía altament apegallosa causada per l'infección inicial con o virus varicella zoster (tamién clamau VZV u HHV-3).[1] A malotía da como resultau una erupción cutania caracteristica que forma chicotas ambollas que fizan, que eventualment forman una costra. Per lo cheneral, prencipia en o peito, a esquena y a cara. Dimpués se propaga a la resta d'o cuerpo. Atros simptomas pueden incluyir calentura, cansera y dolors de tozuelo. Os simptomas gosan durar de cinco a siet días. En ocasions, as complicacions pueden incluyir pneumonía, inflamación d'o celebro y infeccions bacterianas d'a piel. A malotía gosa estar mas grieu en adultos que en ninos.[2] Lo periodo de cova ye de 10 a 21 días dimpués de lo qual amaneix una erupción caracteristica.

A picueta loca ye una malotía transmitida per l'aire que se transmite facilment d'una persona a unatra a traviés d'a tos y os estornudos d'una persona infectada. Se puede propagar d'un a dos días antis de que amaneixca a erupción dica que totas as lesions haigan formau una costra. Tamién se puede propagar a traviés d'o contacto con as ambollas. As personas con herpes zóster pueden transmitir a picueta loca a qui no son immunes a traviés d'o contacto con as ambollas. Per un regular, a malotía se puede diagnosticar seguntes o simptoma de presentación; manimenos, en casos inusuals se puede confirmar per meyo d'a preba de reacción en cadena d'a polimerasa (u PCR) d'o liquido de l'ambolla u as costras.[3] Se pueden realizar prebas d'anticuerpos pa determinar si una persona ye immune. Per lo cheneral, as personas nomás contrayen a picueta loca una vegada. Encara que ocurren reinfeccions per o virus, istas reinfeccions por un regular no causan dengún simptoma.

Dende a suya introducción en 1995, a vacuna contra a picueta loca ha provocau una disminución en o numero de casos y complicacions d'a malotía.[4] Proteche entre o 70 y o 90 per ciento d'as personas d'a malotía con un mayor beneficio pa a malotía grieu. En muitos países se recomienda a inmunización de rutina d'os ninos.[5] A inmunización adintro d'os tres días posteriors d'a exposición puede amillorar os resultaus en os ninos. Lo tractamiento d'as personas infectadas puede incluyir loción de calamina pa aduyar con a picor, mantener as unglas curtas pa disminuyir as lesions per gratar-se y l'emplego de paracetamol (acetaminofén) pa aduyar con a calentura. Pa aquells con mayor risgo de complicacions, se recomiendan medecinas antivirals como aciclovir.

A picueta loca ha de distinguir-se d'a picueta, una periglosa malotía infecciosa causada per virus d'o chenero Orthopoxvirus.

Referencias y notas[editar | modificar o codigo]

  1. (en) Chickenpox (Varicella) Transmission en CDC
  2. (en) Atkinson, William (2011). Epidemiology and Prevention of Vaccine-Preventable Diseases (12 ed.). Public Health Foundation. pp. 301–323. ISBN 978-0983263135.
  3. (en) Atkinson, William (2011). Epidemiology and Prevention of Vaccine-Preventable Diseases (12 ed.). Public Health Foundation. pp. 301–323. ISBN 978-0983263135.
  4. (en) "Routine vaccination against chickenpox?". Drug Ther Bull. 50 (4): 42–45. 2012. doi:10.1136/dtb.2012.04.0098. PMID 22495050. S2CID 42875272.
  5. (en) Flatt, A; Breuer, J (September 2012). "Varicella vaccines". British Medical Bulletin. 103 (1): 115–127. doi:10.1093/bmb/lds019. PMID 22859715

Vinclos externos[editar | modificar o codigo]