Mesa
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Una mesa[1] (d'o latín < MENSA)[2] ye un mueble, con diferents utilidaz domesticas, que ye formau por unas patas, por un regular cuatre, encara que puet tener-ne tres y mesmo nomás una, y un tablero plan que puet estar de diferents formas y grandarias, s'utiliza pa meter-ie obchectos. Pueden tener calaixos u no.
En as casas se situan mas que mas en o minchador u en a sala d'estar y gosan estar acompanyadas por unas cadieras pa poder posar-se arredol. Tamién bi'n puet haber en as cocinas, terrazas, cambras (como escritorio), etc. As mesas son un elemento primordial en cualsiquier cambra u oficina, encara que os usos en son diferents.
O tapet ye un elemento de tapicería u tela encerada pa cubrir a mesa. Os mantels tamién sirven pa cubrir y adornar a mesa, mas que mas a la hora de minchar.
Historia
[editar | modificar o codigo]
As mesas, propiament ditas, se facioron servir por primera vegada en a epoca predinastica de l'antigo Echipto, yeran plataformas de piedra de forma rectangular u cerculars con un suporte central u cuatre patas decoradas con zarpas de felín u patas de remugant y s'utilizaban pa mantener os obchectos luent d'a tierra, ya que os alimentos y as bebidas se gosan servir en servillas que descansaban sobre pedestals. Os echipcios feban uso de mesas chicotas y tablers de chuego.
Os pueblos orientals, como l'antiga China creyoron mesas de forma redonda con un suporte u mesas de tres patas pa poder practicar l'arte d'a escritura y a pintura.
L'antigüedat clasica, Grecia y Roma, estió o punto d'inflexión d'a suya utilidat. Dica alavez s'utilizaban pa realizar rituals pagans. L'uso d'as mesas se fació frecuent y pasó d'estar una simpla pieza de mobiliario pa poder meter y esponer obchectos a ser un mueble pa minchar u escribir, encara que os griegos continaban minchando chitaus en o leito.
Os materials de que yeran feitas yera: marbre u fusta, con decoracions metalicas, por un regular de bronce u aliacions d'archent. As patas yeran decoradas de forma rica, mientres que os tablers yeran mas sobrios.
Pa poder fer mesas de dimensions mas grans usaban plataformas deseparadas y se refirmaban en pilars.
En l'Imperio Romano d'Orient as mesas yeran feitas de metal u de fusta y por un regular teneban cuatre patas cruzadas en forma de X, as mesas pa minchar yeran grans y a soben redondas u semicerculars. As mesas pa a escritura yeran una combinación d'una chicota mesa redonda y un atril.[3]
En a Edat Meya o suyo uso no yera tan conoixiu como en periodos anteriors y nomás yeran emplegadas por a nobleza y en a cort pa os suyos banquez y yeran de construcción sencilla: un tablero refirmau por dos caballez de fusta. En Europa occidental as invasions y guerras internas causoron a perduga d'a mayor parti d'os conoiximientos heredaus d'a epoca clasica. Como consecuencia d'a mobilidat necesaria, por as guerras, a mayoría d'as mesas yeran tablons refirmaus en caballez simples u chicotas mesas redondas feitas de fustería, que reapareixioron entre os sieglos XII-XVI y se situaban sobre una plataforma a o fundo d'os grans salons u salas de ciremonias d'os castiellos, en ellas os combidaus se situaban arredol d'a mesa a on se minchaba mientres s'observaba o entretenimento (bufons, malabaristas, trobadors, etc.). Por ixas envueltas ye cuan prencipió a dar-se importancia a la vaixiella, a cubertería asinas como a os mantels (que gosaban estar decoraus con bordaus).[4]
Mientres o Renaiximiento se convirtió en una verdadera pieza de mobiliario con una gran ornamentación.
As “mesas de refectorio” apareixioron por primera vegada en o sieglo XVII, como un avanz d'a mesa de caballet: istas mesas yeran por un regular prou luengas y amplas y capables de soportar un banquet important en o gran salón u en a sala de recepción d'un castiello.[5]
En o sieglo XVIII se creya o concepto de “minchador” y con iste a ideya de mesa como mueble domestico, si bien en primerías encara yeran armables y desarmables poco a poco fuoron quedando-se en un puesto fixo a on a chent se reuniba arredol pa minchar.[6]
Mientres o sieglo XIX as mesas teneban decoracions minimalistas.[7]
A partir d'o sieglo XX as mesas prencipian a estar de producción industrial, en serie, y pasan a estar mobiliario fixo tanto de casas como d'oficinas u puestos publicos.[8][9]
Referencias
[editar | modificar o codigo]- ↑ (an) Silbia Garcés Lardiés,Francho Rodés Orquín:Un borguil de parolas.Bocabulario dialeutal escolar, Gubierno d'Aragón, 2006, ISBN 84-689-7358-0, p.37
- ↑ (es) José Laguna Campos: Estudio léxico de un inventario oscense de 1565, Archivo de filología aragonesa, ISSN 0210-5624, ISSN-e 2603-7688, Vol. 46-47, 1991, p. 25-58
- ↑ Heyward, Helena. p20
- ↑ Bruno Laurioux: Manger au Moyen Âge
- ↑ Yates, Simon. p12-13
- ↑ Yates, Simon. p22-23
- ↑ Yates, Simon. p60-61
- ↑ Yates, Simon. p98-99
- ↑ L'art de la table du Moyen Age à nos jours
