Marco Aurelio

De Biquipedia
Ir ta: navego, busca
Marco Aurelio
Emperador d'o Imperio Román
Marcus Aurelius Glyptothek Munich.jpg
Marco Aurelio

161-180
Predecesor Antonín Piu
Succesor Comodo

Nombre real Marcus Aurelius Antoninus Augustus
Naixencia 26 d'abril de 121
Roma, Imperio Román
Muerte 17 de marzo de 180
Sirmium u Vindobona, Imperio Román
Dinastía Dinastía Antonina
Pai Marco Annio Vero (biolochico)
Antonín Piu (adoptivo)
Mai Domicia Lucilla

Marco Aurelio (en latín Marcus Aurelius Antoninus Augustus), naixito de Roma o 26 d'abril de 121 y muerto en Sirmium u Vindobona o 17 de marzo de 180, estió un emperador de l'Imperio Román, dende o 161 dica o 180 y un d'os principals filosofos d'o estoicismo.

Entre os anyos 161 y 169 estió coemperador con Lucio Vero, periodo en o que bi habió una guerra contra o Imperio Parto. N'esta guerra os romans vencioron por l'acción d'o cheneral Avidio Cassio, que plegó a saqueyar Ctesifont en l'anyo 164, pero tornoron infectaus por una pestilencia que afectó negativament a la población romana, en especial a lo exercito, que heba de defensar unas mugas muito grans. O mesmo Lucio Vero murió n'esta epidemia.

Marco Aurelio habió de dedicar os suyos esfuerzos mes grans a defensar a muga danubiana, a on se produciban continos ataques de pueblos chermanicos (marcomans y quados sobre tot), y sarmatas (chazigues). Una incursión de chermans plegó a saqueyar Aquileya. As Guerras Marcomanicas rematoron con exito román. Entre 170 y 180 Marco Aurelio escribió o libro Meditaciones mientres yera en ixas campanyas militars.

O exercito román tamién habió de luitar en atras partz d'o imperio mientres yera embrecau en as luitas contra os chermans y sarmatas. Marco Aurelio habió de ninviar a lo suyo millor cheneral Avidio Cassio pa esclafar una revuelta en Echipto.

Marco Aurelio tenió de medico bell tiempo a lo mesmo Galén. A suya salut empeyoró mientres as campanyas contra os chermans y sarmatas. Circuló a falordia que heba muerto, y ixo fació que Avidio Cassio se proclamás emperador, o que tecnicament equivaleba a una sublevación. Marco Aurelio nombró succesor a lo suyo fillo Comodo. Avidio Cassio fue executau por as suyas mesmas tropas.


Predecesor:
Antonín Piu
Emperador de Roma
161-180
Succesor:
Comodo