Hormona
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
Una hormona ye prencipalment una proteína u un esteroide que en os sers vivos pluricelulars regula y coordina l'actividat conchunta d'as celulas. Son mensachers bioquimicos producitos por glandulas endocrinas u de secreción interna ya que tiran as hormonas a lo meyo interno (sangre, hemolimfa u sapia). Nomás actúan sobre un organo determinato dito organo blanco u organo diana as celulas d'o qualo son as solas que tienen en a membrana plasmatica receptors hormonals especificos ta aquellas hormonas que pueden influir en l'actividat de l'organo.
Bi ha una hierarquía d'as glandulas de secreción interna; asinas, bellas hormonas d'a hipofisi actúan sobre as glandulas perifericas de secreción interna, y l'aumento d'hormonas en a sangre aturan l'actividat d'a hipofisi, de traza que s'estableixe un mecanismo d'interdependencia que tiende a mantener constant o ran d'hormonas en a sangre.
O estudio d'as hormonas se fa experimentalment en animals en extrayer-les a zona productora, o que i prevoca sintomas de deficiencia. La restauración d'a normalidat se consigue por inchección d'extractos d'a parti extraita; d'ista parti se'n ha puesto quitar una substancia pura que tienga istos efectos, que ye a hormona, y d'a qual s'ha puesto estudiar a composición, o metabolismo, etcetera...