Faro de Matxitxako

O faro de Matxitxako (Matxitxako itsasargia en vasco) ye un faro situato en o lugar de Bermeu en o cabo que leva o mesmo nombre.

Bermeu ha teniu tres faros a lo largo d'a suya historia: o faro d'Errosape (1912) (Errosapeko Itsasargia en vasco) en a punta de Lamiar, y dos en Matxitxako; l'antigo construyito en 1852 i d'o qualo nomás remane que a suya torre, y l'actual.

A una altaria de 102,6 metros sobre o ran d'o mar y en una torre octogonal de 20 metros bi ye o faro. Unito a iste bi ha un edificio de dos plantas. Antigament bi habió dica tres torrers treballando en o faro, que hue ye automatico. Iste nuevo faro, inaugurato en 1909, estió obra d'o conoixito incheniero Rafael de La Cerda, substituyindo a l'antigo faro de 1852. A razón de sustituyir-lo fue que se quereba aumentar a distancia dica on plegaba a luz dica as 35 millas. Y a mas, que en lugar de luz contina fese rapedas lampadiadas de luz cada cinco segundos. Ta satisfer as nuevas necesidatz, se mercó un nuevo instrumento. Tamién se miró de trobar un puesto mas adempribiato ta que as nubles, as boiras marinas u as bromas no taparan o uello optico. Se trobó iste puesto a 116 metros d'o viello faro. O edificio nuevo costó 165.084,25 pesetas.

L'antigo faro estió de 1854 dica 1863 escuela de torrers, ta estar tresladata dimpués a Madrit. En o faro de Matxitxako se chubiló o zaguer torrer de Vizcaya.

En primeras o mecanismo teneba 1,84 metros de diametro y a suya luz plegada dica as 30 millas y a lampa yera de petrolio. En 1926 a lampa fue substituyita por atra tamién de petrolio. A primera lampa electrica s'instaló en 1937, estando una lampa monofasica de 4.000 watts, que en 1955 se cambeó por l'actual que en tien 3.000 y ye trifasica. En l'anyo 1963 ta aduyar mellor a la navegación s'adhibió una bocina, ta fer ixó s'enderrocaron os repuis d'as viviendas y se ficoron os altavoces en o puesto an yera a viella torre.