Esquistosidat
A esquistosidat[1] ye una estructura cheolochica que consiste en a formación d'uns plans perpendiculars a la dirección d'os esfuerzos tectonicos (plans d'esquistosidat), que permiten que a roca se bade y pueda crebar-se en losas seguindo estos plans. En estas rocas bi ha una orientación d'os minerals plans y alargatos a favor d'os plans d'esquistosidat. Se puet veyer esquistosidat en os plegos anisopacos, y os plans de esquistosidat son perpendiculars a los plans d'estratificación en a zona d'a xarnera.
A esquistosidat se puet formar en rocas sedimentarias, pero a sobén se produce en rocas metamorficas, y ye tipica d'as losetas porque se desembolica millor contra més fin siga o gran. A vegatas a esquistosidat vien acompanyata de procesos de disolución, concrentando-se as sustancias insolubles en os plans d'esquistosidat.
Si a la vegata que actuan os esfuerzos tectonicos bi ha condicions idonias pa que se produga metamorfismo, os minerals metamorficos creixerán a favor d'os plans d'esquistosidat, a esquistosidat no será tan perfecta y os plans d'esquistosidat se converten en superficies irregulars definitas por minerals micacios que rodeyan a los minerals més gruesos como o cuarz, os feldespatos y os granaz; a estructura se denomina foliación.
Referencias
[editar | modificar o codigo]- ↑ (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
Bibliografía
[editar | modificar o codigo]- Francisco Anguita Virella, Fernando Moreno Serrano, Geología procesos internos. Edelvives, 1978.
| Control d'autoridaz |
|
|---|
Datos: Q2860111