Pueblos eslaus

Iste articlo se ye editando como parte d'una actividat escolar que encara no ye rematada. Por favor, antes de fer qualsiquier corrección u reescritura de l'articlo, contacte con os editors en a suya pachina d'usuario u a pachina de descusión de l'articlo ta poder coordinar a suya redacción. Ista plantilla se retirará malas que remate l'actividat.

Estatos controlatos por os Eslabos

   Eslabos ozidentals

   Eslabos orientals

   Eslabos d'o sur

Os pueblos eslabos son un conchunto de pueblos natibos d'Europa Zentral e Oriental que tenioron una gran espansión en l'Alta Edat Meya de traza que güei os pueblos de luenga eslaba ocupan en Europa una superfizie mayor que os pueblos indoeuropeus d'atras brancas més antigas.

As luengas eslabas actuals encomenzoron a deseparar-sen dende os sieglos VI e VII e son més parexitas entre ellas que as luengas neolatinas.

Os eslabos ocuporon un bueito demografico que se creyó cuan muitos pueblos chermanicos (en espezial lurs clases dirichents) emigroron dende Europa Zentral enta o Imperio Román. Cuan o Canato d'os Abaros dominaba a cuenca d'o Danubio a poblazión base yera eslaba e s'estendilloron por as marguins d'os territorios baxo influyenzia abara.

Os eslabos no teneban tradizión estatal, y encomenzoron a formar estatos baxo influyenzia de pueblos d'as estepas como os bulgaros, Costantinoble, u d'os chermans. Ixa manca de tradizión estatal fazió que os eslabos reblasen debant d'a espansión alemana ta l'este, dica que se formó un estato eslabo fuerte, o reino de Polonia, en asoziazión con Lituania, que tenió a echemonía d'Europa Zentro-Oriental en o sieglo XVI, ocupando un amplo territorio entre a Mar Baltica e a Mar Negra.

Atro estato eslabo, Rusia, ocupó o puesto cheopolitico de Polonia cuan entró en decadenzia. En a Europa d'os Imperios os pueblos eslabos yeran repartitos entre o Imperio Ruso, o Imperio Otomán, o Imperio Austrongaro e o Prusia u dimpués Imperio Alemán, e por ixo a primera Guerra Mundial afectó muito a toz os pueblos eslabos, beluns d'os cuals consiguioron un estato independient cuan s'esminglanoron estos imperios. A propaganda panchermanista feba beyer a primera Guerra Mundial como una guerra entre Chermanicos y Eslabos, y este punto de bista subchazeba en as ideyas nazionalsozialistas en o periodo d'entreguerras e a Segunda Guerra Mundial.

Dimpués d'a segunda Guerra Mundial a mayor parte d'os eslabos quedoron en estatos controlatos por os comunistas, dica que con a decadenzia d'o rechimen comunista de Moscú permitió a los estatos satelites de desfer-sen d'o control d'as autoridaz comunistas e cambeyar de rechimen.

Estrutura sozial

Os primers eslabos s'aplegaban en clans familiars patriarcals, unitos en federazions dirichitas por os més biellos.

As federazions de clans orichinoron tribus, con culto común a debantpasatos comuns e con organizazión melitar (zentena, unidat basica d'a leba; quiliarquía u conchunto de 1000 ombres).

Os capitostes d'os clans esdebinoron con o tiempo una clase aristocratica, pero o localismo u as particularidaz locals no dixan fer asoziazions superiors y ser pueblos més poderosos .

Cuan os eslabos ya yeran organizatos en "confederazions tribals" u estatos se bei una terminolochia amprata de pueblos bizins no eslabos: prenzipe se diz Kunedzi, que probién d'o chermanico König, korlji (en checo kral) probién de "CARLES MAGNO", y zar probién d'o latín "CAESAR"..

Orichen

Culturas arqueolochicas en ixas embueltas d'os orichens eslabos

O tema d'a etnochenesis d'os pueblos eslabos ha estato muito polemico porque i eba muita esredat en as fuents. Muitas yeran as culturas arqueolochicas d'a Edat de Bronze, de Fierro u de tiempos d'os romans que se miraban como candidatas d'estar a cultura proto-eslaba. En as zagueras decadas os arqueologos discuten entre dos ozions:

Pa beluns os primers eslabos bibiban en epoca romana en Polonia e Rusia meridional, on fuoron incluitos en unas culturas sozmesas a la influyenzia d'o Imperio Román: Prezeworsk e Cernjahov. Pa beluns a cultura de Prezeworsk estió propia d'os bandalos e bizins e a cultura de Cernjahov estió propia d'os gotos d'a Mar Negra e pueblos sozmesos.

Pa atros l'orichen d'os eslabos ha de mirar-se en as rechions forestals de l'alto Dniéper que no tenioron contacto con o mundo román, alabez estarían representatos por a cultura de Kiev.

Michel Kazanski fa notar que a segunda opzión ye més probable ya que as culturas més rezients atribuitas a los pueblos eslabos no amuestran influyenzias romanas e si que amuestran parexitos con a cultura de Kiev.

Os eslabos s'estendilloron probablement dende o sieglo V dende as selbas de l'Alto Dniéper enta o Danubio por un territorio ocupato dica ixe inte por a Cultura de Cernjahov. Esta cultura representa a poblazions chermanicas, (os gotos), e no chermanicas, (dacos, chetos e sarmatas sozmesos a los gotos).

Os dos reinos gotos eban estato desfeitos por os uns a fins d'o sieglo IV. Os chazimientos més antigos atribuitos sin duda a poblazions eslabas son prezisament d'esta rechión e datan de tiempos d'o dominio un (Kodyn, Teremcy, Hitcy, Pescanoe). Dende o sieglo VI os eslabos son documentatos en a muga danubiana d'o Imperio Román d'Orient. Seguntes as fuents escritas os eslabos en o sieglo VI se distribuiban en dos unions tribals: Procopio de Zesaria enta l'año 562 parla d'os esclabens (sklavenoi) e os antos en a suya obra "Istorias sobre as guerras". O bispe Chordanes menziona en os suyos escritos de 534 a los esclabins e a os antos, como pueblos benetos que ocupan un amplo territorio en os Alpes Orientals, cuenca d'o Danubio e Alta Bistula. Marzelín Comes ofrix datos parexitos .

L'arqueolochía permite distintinguir entre tres culturas eslabas contemporanias:

• A cultura de Praga-Korcak, atribuita a los esclabens, que s'ha descubierto en Ucraína ozidental, Polonia, Boemia, Morabia, Eslobaquia e Alemaña zentral
• A cultura de Pen'kovka. atribuita a los antos, s'estendilla en a zona d'estepa arbolata d'Ucraína e Moldabia.
• A cultura de Kolocin, en a bal alta d'o Dniéper.

Os arqueologos han costatato a omochenidat d'estas culturas y elementos comuns en abitat, necropolis, zeramica, armamento lichero, bestuario e organizazión sozial.

Os eslabos sozmesos a los abaros e a espansión eslaba

Enta l'año 570, os esclabenos son sozmesos por os abaros, que s'establixen en a cuenca danubiana, e atacan con ellos o Imperio Román d'Orient. Os antos esdebienen aligatos de Costantinoble cuentra os abaros. A prenzipios d'o sieglo VII o limes danubián desaparix pa cutio baxo a presión d'os abaros y eslabos. Entre l'año 623 e 631 os eslabos se liberan d'o chubo d'os abaros e mientres o sieglo VII esdebienen os amos d'os Balcans.

Referenzias

Iste articlo ye un borrador. Enamplando-lo aduyarás a amillorar a Biquipedia.

Bibliografía

• Michel Kazanski LAS CULTURAS BÁRBARAS EN EUROPA ORIENTAL Y SEPTENTRIONAL, testo que fa parte d'o GRAN ATLAS DE ARQUEOLOGÍA S.A EBRISA 1986.