Carlos Magno

De Biquipedia
(Reendrezau dende Carlemaño)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Articlo d'os 1000
Carlos Magno
Rei d'os francos, rei d'os Longobardos y emperador d'Occident


9 d'octubre de 76828 de chinero de 814
Predecesor Pepín lo Petit
Succesor Ludovico Piu
Naixencia 2 d'abril de 742
Lidje
Muerte 28 de chinero de 814
Aquisgrán
Enterreco Seu de Aquisgrán
Conchuche/s Desiderata (770-771)
Hildegarda (771-† 783)
Fastrada (783-† 794)
Luitgarda (m. c. 794-† 800)
Descendencia 20 fillos a destacar:
Loís I o Piadoso
Dinastía Carolinchios
Pai Pepín o Petit
Mai Bertha de Laon
Sinyal

Carlos Magno, Carlo Magno u Carlos I O Gran estió rei d'o Reino franco y, dende o 25 d'aviento de 800, o primer emperador d'o Sacro Imperio Romano Chermanico. Naixió en bel lugar d'a Renania, ye fácil que en Aquisgrán, o 2 d'abril de 742, y morió o 28 de chinero de 814 en Aquisgrán (hue en Alemanya).

Carlos Magno yera fillo d'o rei franco Pepín lo Petit y de Bertha de Laon, encara que fillo ilechitimo dica o matrimonio d'os suyos pais dimpués d'a suya naixencia.

Conquirió o Reino Longobardo en l'anyo 774. Organizó expedicions a lo sud d'os Pireneus y establió a Marca Hispanica. S'anexionó Bavera y derrotó a los avaros pa cutio. Sozmetió a los saxons en unas cuantas campanyas. Fue coronau emperador de Roma en l'anyo 800.[1]

Carlomagno ye famoso per las suyas campanyas militars pero tamién destacó como administrador gracias a las numerosas reformas que se levoron a cabo mientres lo suyo reinau, las fació a toz os livels: economicas, gubernamentals, militars, culturals, educativas y eclesiasticas que posoron las bases d'o futuro economico europeu. En l'actualidat ye considerau no nomás lo fundador d'as dinastías francesa y alemana, sino tamién lo pai d'Europa ya que lo suyo imperio unificó per primera vegada la mayor parte d'Europa occidental dende la caita de l'Imperio Romano d'Occidente, y lo dito renaiximiento carolinchio establió una identidat europea común.

Campanyas contra os saxons[editar | modificar o codigo]

Carlos emprendió una primera campanya contra Saxonia y destruyó o suyo principal santuario, o Irmensul en 772. En 775 sozmetió a os angarians, os ostfalianos y os westfalianos. En 776 organizó una marca en territorio Saxón. En Padeborn convocó una asamblea y procedió a lo baptismo colectivo d'os saxons, dividindo dimpués o país saxón en zonas de misión comfiatas a monches francos. En Padeborn recibió a un d'os walís alzatos contra o emir de Cordoba.

Mientres Carlomagno yera en o norte d'Espanya os saxons se rebeloron contra os francos y os misioners cristianos y Widuking estió o caudiello d'esta rebuelta. Una serie de campanyas anyals entre 779 y 785 con baptismos forzatos y fendo grans mortaleras rematoron con a resistencia saxona y lo mesmo Widuking se rindió, se sozmetió y recibió o baptismo estando Carlomagno o suyo padrino. Establioron una administración franca y una organización eclesiastica regular en tota Saxonia, que dende alavez conoixió un rechimen de terror y deportacions en masa. Dimpués d'a sumisión de Saxonia fue sozmesa Frisia a lo norte y este d'o Zuiderzee en 785 y os eslaus obroditas se convertioron en vasallos d'os francos.

En 789 Carlos Magno ninvió una expedición de castigo contra os eslaus welatavos que heban atacato a os obroditas. En 790 ninvió una expedición contra Frisia. Entre 794 y 797 os saxons se tornoron a rebelar y Carlos Magno lis ninvió cuatre expedicions. Nordalbinchia y Wihmode fuoron conquiestos y posó a os francos en contacto con os daneses.

Campanyas contra os musulmans de l'Al Andalus[editar | modificar o codigo]

Carlos Magno recibió en Padeborn a lo wali de Saraqusta, devantato contra o emir de Cordoba, y decibió aduyar-lo. En primavera de 778 ninvió una doble expedición a la peninsula iberica: un exercito trescruzó os Pireneus orientals y éll mesmo con atro exercito pasó por Gascunya, Navarra, Pamplona y Uesca y s'achuntó con l'atro cuerpo chunto a Zaragoza, que, en contra d'o previsto no li ubrió as puertas. No podendo prener a ciudat, se'n tornó por o mesmo camín, y en Pamplona escachó as murallas d'a ciudat. Manimenos en agosto de 778 os bascons acotoloron a suya retraguarda, incluito Roldán (o prefecto de Bretanya), en la que será conoixita como batalla de Roncesvals. Seguntes pareix alavez os hispano-cristianos encomenzoron a ocupar franchas pirenencas de l'Aquitania carolinchia.

En l'anyo 793 os arabes y berbers de l'Al-Andalus atacoron y tornoron a ocupar territorios occitans que ya heban ocupato en atras ofensivas y que heban tenito que deixar a los francos. Cuan plegoron enta Narbona o marqués Guillén los aturó en a marguin de l'Orbieu, entre Narbona y Carcasona, forachitando-los de nuevo t'a peninsula iberica. En l'anyo 795 os exercitos francos penetroron de nuevo en a peninsula ocupando Chirona, Cardona y Vic, mientres os musulmans disidents clamaban a los francos en l'anyo 799 pa que los aduyasen en l'Alto Aragón y Balears. Dimpués de 2 anyatas de setio Barcelona capetuló y lo rei Loís, fillo de Carlos Magno, entró en la ciudat (801). D'esta traza se formó, encara unita a Septimania, lo que dimpués será a Marca Hispanica.

A partir de l'anyo 806 los musulmans saqueyoron Corcega, Provenza y Italia, y l'exercito terrestre franco prenió Pamplona en l'anyo 806, plegó enta l'Ebro en l'anyo 809, no podió prener Uesca, pero prenió Tortosa en l'anyo 812.

Carlos Magno en fuents aragonesas[editar | modificar o codigo]

En o Liber Regum lo mencionan como Charle Mayne.

est rei Pepín lo Petit priso muller la reina Bertha con los grandes pedes, qui fo filla de Floris e de Blanca Flor, et ovo en ela fillo a Charle Mayne. (Liber Regum)

Lo mencionan tamién como Charlemaine en o "Libro d'as Marabillas d'o Mundo", en un parrafo on a onomastica emplegata ye francesa.

En aqueill templo estaua charlemaine cuando el angel li traixo la prepucia de nuestro seynnor de la circumcision, Et eill la traixo e iyx la cappiella a .viij. legoas de liege. Et depuest charles el chauues la fezo traher a poitiers Et depues fue traida a chartres.

En o Libro de los Emperadors s'escribe Rey Carles, igual que en atros libros aragoneses medievals, pero tamién Carlos de Francia.

Aprés aquesto, el papa fuyó a Karles, rei de Francia, con el socorro del cual aprés tornó en la seu apostolical e fizo vengança de sus enemigos. E del tempo aquesti papa fue yusmesa Roma a Francia, que el dito papa coronó al rei de Francia emperador de Roma.
Carlos de Francia, fecho emperador de Roma, segunt que desuso havemos dito, envió sus embaxadores a la emperadriç por tomarla por muller. E cuanto por la emperadriç, no sería fincado; mas Aerçio fincado, se enforçó tanto que el matrimonio no fue fecho,

En a Cronica d'os Conquiridors s'escribe Karles Magno u Karles. :

Fue pues todo el numero delos anyos del grant Constantino entroa Karles Magno CCCCLXXXII, et los emperadores fueron LI. La ora el imperio Romano fue traslatado de Constantinoble en Karles Magno, rey delos Francos, et enlos reyes successores de aquel. Et duro el imperio en Francia CVI anyos dius VIII emperadores.

En o "Libro d'el Trasoro" lo mencionan como Carlo Magno en o capítol 89:

Et Desideor, rey de Lombaria començo de la otra part guerra, que Teolofre su padre nonde auya feyto tanto en su vida. E Adrián el apostolico rogo Carlo Magno, fillo de Pepin que la ora era rey de Francia que el vujes en Ytalia en a si que en la çibdat de Papia en do el rey staua e tomaua plazer con su muller e con sus fillos; e la ora fizo jurar la fealdat de Santa Eglesia a toda Ytalia e el mjsmo, e pues lo leuo preso en Francia.

Bibliografía[editar | modificar o codigo]

  • (en) Riché, Pierre (1993). The Carolingians: A Family Who Forged Europe. Universidat de Pennsylvania Press. ISBN 0-8122-1342-4.

Se veiga tamién[editar | modificar o codigo]

Referencias[editar | modificar o codigo]

  1. Jean Sellier.: Atlas de los pueblos de Europa Occidental. Editorial Paidós. pp12

Vinclos externos[editar | modificar o codigo]