Esbarizaculos

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Un esbarizaculos

Un esbarizaculos ye una construcción de caracter recreativo, que consiste en una rampa eslizadiza elevada en a suya parti posterior por una escala que permite l'ascenso a la parti superior pa proceder a esbarizar-se sobre a superficie. Se puet considerar como a parti central d'a diversión en os parques aquaticos modernos.

Se tracta d'una parola compuesta formada por o verbo "esbarizar", mover-se (una persona u cosa) sobre una superficie, rastrando-se, eslenando-se u esbarando-se, y o substantivo "culo", a parti d'o cuerpo sobre a que mos posamos y por tanto esbarizamos.

Tipos d'esbarizaculos

Por a suya forma

Esbarizaculos en espiral

Os esbarizaculos son tradicionalment metalicos, ubiertos y con una superficie recta. Manimenos, bi ha atras menas de esbarizaculos:

Esbarizaculos en un parque aquatico

• Esbarizaculos de tubo. Consiste en una estructura circular de plastico a traviés d'a que se'n foten os ninos.
• Esbarizaculos en espiral. A superficie pa esbarizar-se ye plastica y describe una curva que puet estar más u menos zarrada.
• Esbarizaculos de diferents pendients . A superficie presenta dos u más pendients sobre as que esbarizar-se.
• Esbarizaculos aquatico. Propio de parques aquaticos, sobre a suya superficie corre una tela d'augua que favoreixe poder eslizar-se. Iste esbarizaculos puet estar de gran largaria y tién quantas altarias y a-saber-las curvas en o suyo camín. A esferencia d'a resta, en o esbarizaculos aquatico se pueden adoptar diferents posturas d'arranque:
  • Posau
  • Chitau entabant
  • Chitau entazaga

Components

Os components d'un esbarizaculos aquatico pueden variar d'alcuerdo a l'uso que se'n faiga, pero basicament en un parque aquatico bi ha:

• Esbarizaculos u rampa. Por un regular de fibra de vidre con curvas y chiros, encara que bi'n ha rectos, que son os mas arriscaus como o "kamikaze".
• Torre d'acceso. Sirve pa arribar a la parti de salida, puet estar metalica, de cimento, de fusta u emplegando altarias cheograficas d'o terreno.
• Torre de soporte. A on s'asienta o esbarizaculos.
• Equipo mecanico. Conforman as bombas y filtros independients d'o sistema de recirculación d'as piscinas pa captar l'augua pa o esbarizaculos.
• Piscina exclusiva d'arribada. S'ha de considerar una piscina exclusiva pa l'arribada d'os banyistas pa mirar d'evitar accidents. Encara que ye habitual que se meta en piscinas existents con as debidas normas de seguridat.

Por o tipo d'acceso

Se puet acceder a o esbarizaculos dreitament por una escala u bien con una construcción en a que os ninos se pueden entretener aportando más valura estetica a la obra. A estructura puet adoptar as formas más variadas: torreta, fuerte, caseta, etc. Asinas mesmo, l'acceso se puet fer a traviés de quantos elementos, bien alternativament, bien en o mesmo chuego: escalas, cuerdas, espalderas, etc.

Vinclos externos

• Se veigan as imachens de Commons sobre esbarizaculos.