Ir al contenido

Dependencia emocional

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A dependencia emocional consiste en un "patrón persistent de necesidaz emocionals insatisfeitas que se preban d'abondar de traza desadaptativa con atras personas".[1] Ye una mena de dependencia relacional chenuina, replecando as dependencias relacionals como trestuques caracterizatos por a expresión de conductas de mena adictiva en as relacions interpersonals.[2] As relacions que estableix l'individuo con dependencia emocional son asimetricas, manifestando una actitut de chusmesa enta l'atra persona.[2] En o caso concreto d'as relacions de parella, se tractarba d'una necesidat extrema de caracter afectivo que un individuo siente enta la suya parella.[1] As dependencias interpersonals rematan por afectar a o conchunto de sistemas d'o subchecto:[2][3]

  • Cognitivament, as personas que lo pateixen en mantienen de creyencias y esquemas sobre ellas como personas febles y amenistatas, n'han d'alticamaduras, de remugacions, de zelos etc... Encara que as conductas d'istos individuos pueda modificar-sen en función d'a situación u en función d'a suya percepción de ganancias y perdas en distinctos momentos, as creyencias se mantienen perén estables y son as que menan a resta de sistemas d'o subchecto.[3]
  • Emocionalment, en pateixen de medrana a l'albandono por parti d'a parella, anxiedat debant d'a deseparación, disforia intensa debant d'o refús, medrana a la valguación negativa por parti d'otris, etc...[3]
  • Motivacionalment, sienten una empenta de mirar de contino contacto con a parella, deseyos de protección y d'aduya, etc...[3]
  • Conductualment, en realizan de conductas de chusmesa, de complacencia, de busca de contacto con a parella, etc...[3]

L'individuo con ista mena de dependencia en manifiesta, por tanto, de pensamientos, creyencias, emocions y conductas que chiran arredol d'a necesidat que mantién por vincular-se estreitament con personas que son importants ta él, en iste caso, con a parella.[3][4]

A dependencia emocional ye un trestuque que prevoca una estricia significativa no solo en l'individuo que la pateixe, sino que tamién en apolarga es nocimientos ta lo suyo cerclo mas amanato y mesmo tiene consecuencias ta la sociedat en cheneral.[5] A-saber-las rechiras han contrimostrata una correlación positiva entre a dependencia afectiva y simptomatolochía anxioso-depresiva[6][7][8], asinas como con malautías fisicas[5][9] y simptomas somaticos.[10] Tamién se son trobatas evidencias que relacionan a dependencia con un mayor uso d'os recursos sanitarios: requieren un mayor numero de días d'hespitalización[9] y recurren en mayor mida a lo servicio d'urchencias que a población normal.[5] Se ye contrimostrato que istos pacients punctúan mas alto que pacients no dependients en a-saber-los simptomas psicopatolochicos como obsesión-compulsión, sensibilidat interpersonal, hostilidat u ideación paranoide.[11][12] A inchent necesidat d'ista mena de pacients enta las suyas parellas y a medrana extrema a la ruptura d'a relación esplanicarba a mayor prebabilidat d'os dependients emocionals a veyer-sen embrecatos en casos de violencia de chenero[13][14] y a veyer-sen embrecatos en problemas legals.[15] En zagueras, se ye relacionata la dependencia emocional con una mayor taxa de suicidios.[3][16]

Se tracta d'un trestuque poco estudiato dica agora;[11] de feito, no se reculle como tal en os manuals diagnosticos actuals (DSM-5 y CIE-10), a despeito de que os terapeutas se troban cada vegada mas con ista problematica en as suyas consultas.[17][18] Nos trobamos con rechiras sobre o tema a on cosa menos que un 49,3% d'a muestra replegata se declara dependient emocional.[19] En o repective a las diferencias de chenero, os datos son diversos. En b'ha de rechiradors que esfienden que, debito tan a causas biolochicas como culturals, ye un trestuque que afecta mas a mullers,[20][21] encara que otris han observato que en l'adolescencia sembla estar que ista diferencia se disbaneix.[8][22] Unatro grupo de rechiradors esfiende que as diferencias entre os dos cheners se deben a la utilización de distinctas ainas de mida: entre que as mullers punctúan mas alto en dependencia emocional en midas d'autoinforme, no se'n troban diferencias significativas si s'emplegan atras menas de midas.[3][23]

Caracteristicas d'a dependencia emocional

[editar | modificar o codigo]

Entre as principals caracteristicas d'a dependencia emocional, destacamos as siguients:

  • Os dependients emocionals presentan una autoestima muito baixa y un autoconcepto negativo.[2][8][20][24] En considerar-sen a éls mesmos como sers vulnerables y necesitatos, se poderba orichinar a resta de manifestacions d'a dependencia emocional. Por eixemplo, dito autoconcepto puet revellar-ne de motivacions ta bienquedar con aquellas figuras que en puedan ofrir de refirme y de cudiato e, por tan, en chenerará de conductas chusmesas y encaminatas ta la busca contina de dita figura. Encara que a conducta d'os pacients con dependencia interpersonal pueda variar en función d'as situacions y seguntes n'i perciban d'esquimens y de nocimientos, istas creyencias sobre éls mesmos remaneixen constants.[3][6][16]
  • Ditos pacients han un esmo amugato u nulo d'o problema.[25] Isto se debe a os mecanismos de negación y d'autoenganyo que despliegan, que dificultan ista presa d'esmo (por eixemplo, n'han de pensamientos d'a mena "no puedo vivir sin d'él/d'ella"; "tampoc yéranos tan mal"; "seguro que no lo torna a fer"; etc...). Distorsionan a realidat ta reafirmar-sen en as suyas creyencias y ta bozar-ne d'aspectos que resultan socialment cuestionables tan ta éls mesmos como ta las personas d'o suyo arredol.[3][25]
  • Mantienen una posición subordinata en as relacions. S'amuestran chusmesos con as suyas parellas en cuenta d'as suyas propias necesidaz, opinions, deseyos etc... Son capables d'endurar-ne d'insulto, de rebaixadas y mesmo de maltracto fisico.[13][14][20] Destinan a mayor parti d'o suyo tiempo y esmamixada en estar chunto a la parella, en cuenta d'atras actividaz como lo treballo, as aficions u como pasar-ne de tiempo con a familia y amigos.[2][3][20][26]
  • En realizan de grans esmanixadas ta mantener a relación a penar d'estar sofrendo, presentando una incapacidat de crebar a relación.[2][3][26]
  • Gosan presentar-ne de commorbilidatz con anxiedat y depresión u simptomatolochía anxioso-depresiva.[7][8][20] En menor mida, tamién se troban comorbilidaz con trestuques d'alimentación.[3][16]
  • N'han de bellas habilidaz socials muito pobres, marcatas por una radita asertividat.[17][20][27][28] Ista caracteristica estarba relacionata con l'autoconcepto que mantienen. Os pacients con dependencia emocional no han desembolicato una autopercepción identitaria: no n'expresan ni d'emocions ni d'opinions importants ta éls porque perciben que os d'a suya parella son mas importants.[3][28][29]
  • Presentan un estato d'animo negativo u disforico.[1][30][31] S'aprecian cambeos socials notables en o estato de l'animo cuan, dimpuesas d'haber crebata la relación con a suya parella, en reciben de noticias u consideran que en b'ha de posibilidaz de reprener a relación dimpués d'un amanamiento.[3][20]
  • A suya expresión corporal en denota de tristeza contina y d'esvalimiento.[20] Se son trobatas relacions positivas entre o livel de dependencia emocional y a frecuencia d'a conducta de plorar. Manimenos, ista correlación no solo se debe a la existencia d'un afecto negativo como responsable d'o planto; os dependients emocionals lo emplegan antimás como una traza de comunicación ta mirar-ne de repunte u de proximidat con os otris.[3][32]
  • Han un locus de control externo.[31] En cometen de "falacias de control", pasando de creyer-sen responsables de cualsiquier acayecimiento d'as suyas vidas a veyer-sen impotents y sinse garra capacidat d'exercer-ne de control. Ista distorsión cognitiva chenera una graniza angunia en os dependients emocionals.[3][33]
  • Mantienen unas creyencias richidas y exacheratas sobre l'amor romantico y sobre cómo iste debe estar. En cometen de distorsions cognitivas d'a mena "deberbas" sobre as relacions amorosas.[3][33]
  • L'absencia de parella u a ruptura d'a relación en prevoca de sindrome d'abstinencia y craving: sentimientos de dolor, de soledat y intentos continos d'estar con a parella u de reprener a relación como siga.[3][20][27][30][34][35]
  • Gosan haber-ne de varias parellas a o largo d'a suya vida. Son raditos os periodos en os que no mantienen una relación.[3][20]
  • N'han de medrana y d'intolerancia ta la soledat y ta la frustración, o que lis produz una graniza anxiedat debant d'a deseparación.[2][20][26][36] Se tracta isto d'una consecuencia d'a suya baixa autoestima; no soportan estar solos con éls mesmos, y por tanto miran d'estar de contino con a suya parella. As conductas de comprebación (aguaitar a la parella, leyer os mensaches d'o mobil y d'o correu d'ella, etc...) y as de retornada (intentos agoniatos por estar perdonatos, retornada d'obchectos danyatos en as descusions, etc...) se manifiestan cuan a persona pretende d'estalbiar as suyas experiencias privatas.[37] Os dependients emocionals s'amuetran muito capables en atras dembas d'a suya vida, como los estudios, o treballo, os quefers u as chestions cutianas, y por tanto a medrana que sofren a la soledat no se debe a la suya incapacidat u a una radita habilidat ta apanyar-sen en a vida diaria (como poderba estar o caso d'os pacients con trestuque de personalidat por dependencia). A suya necesidat de l'otri ye simplament emocional.[3][20]

As parellas triatas por os dependients emocionals

[editar | modificar o codigo]

Se ye tractau d'identificar tamién as caracteristicas d'as parellas que gosan triar os dependients emocionals. Istas parellas gosar haber-ne d'una autoestima alta u muito alta (pueden mesmo plegar a estar narcisistas) y se tractan de personas explotaderas.[2][3][20][30]

A dependencia "dominant" ye una mena particular de dependencia emocional.[20] As caracteristicas d'ista mena de dependient atipico son semblants ta las d'as parellas d'os dependients emocionals mas comuns, pero trobamos bellas diferencias. A parella d'o dependient emocional no amugará o suyo rete interpersonal ta adedicar tot o tiempo ta la suya parella; por cuentra, o dominant mirará de que entramos remangan en una especie d'esfera arredrata d'o mundo. Dimpués d'una ruptura, a parella d'o dependient emocional no mira de reprener a relación (de feito, gosan estar éls qui creban); entre que o dependient dominant recorrerán a suplicas, rogativas, menazas u tot o que siga en a suya man ta reprener a relación.[20] Poderba estar a mena de dependencia caracteristica d'os maltractadors de chenero. De feito, se ye trobata una correlación positva entre violencia de chenero y dependencia emocional en hombres.[3][13]

Factors causals y mantenedors

[editar | modificar o codigo]

D'espeso s'ementan os factors causals y mantenedors mas relevants ta la dependencia emocional:

Entre os factors causals destacamos:

  • A vivencia d'un apego inseguro y evitativo con a figura de referencia durando a infancia: siguindo a teoría de l'apego de Bowly, as experiencias vivitas en a infancia n'estableixen d'esquemas en as personas que guidan o suyo comportamiento interpersonal en a edat adulta. A-saber-los autors afirman a relación entre a mena d'apego vivito en a infancia y a mena d'apego que s'estableix en l'adultez en as relacions romanticas.[38][39] A livel cerebral, se son trobatas similituz entre o funcionamiento durando l'amor materno y durando l'amor romantico: a función de l'esmo ye suspendita y en entramos bi ha una activación d'o nuclio estriato.[40] Ye una evidencia biolochica d'a relación entre l'apego vivito en a infancia y o que s'estableix en as relacions de parella en a edat adulta. Ista relación puet deber-se a que entramas trazas d'amor comparten un mesmo proposito evolutivo, o mantener o desembolique d'a especie, asinas como una mesma función, o lograr que os individuos remangan chuntos por bel periodo de tiempo. Por atro costato, una mena d'apego inseguro en a nineza puet regudir en conductas dependients de l'individuo. Tamién a sobreprotección por parti d'os pais durando a nineza en poderba producir de dependencia emocional, debito a que no se permite a os individuos de realizar conductas de traza autonoma.[18][24][24][41] A vivencia d'un apego inseguro durando a infancia percute a livel cerebral, amugando a función d'a crosta orbitofrontal ta regular-ne d'emocions como a medrana, a carranya etc...[41] Doncas, l'apego inseguro durando a infancia en presenta de similituz con a conducta d'os pacients con dependencia emocional: a temor debant a perda d'a figura d'apego, a busca de proximidat y anxiedat debant d'a deseparación.[37] En cambeo, si un subchecto vive una relación d'apego evitativo con a suya figura de referencia en a infancia, puet plegar a formar-se un esquema a on as figuras d'apego devienen sers inagafables, fredos y distants con qui caldrá esdoblar toz os recursos y esmanixadas ta adubir o suyo ficacio u lo suyo carinyo. En o respective a éls mesmos, l'autoconcepto que forman resulta negativo, no se consideran personas dignas de recibir amor y la suya autoestima y visión d'éls mesmos las forman a partir d'o comportamiento d'os otris con éls.[20] En zagueras, una mena d'apego seguro aduya a formar una identidat solida, con que consiguirá establir-ne de relacions interpersonals de cualidat. Manimenos, con un apego de mena inseguro u evitativo, l'individuo formará una identidat de mugas foscas, que se solapará con a d'os otris en as relacions interpersonals; regudindo, doncas, en relacions dependients u codependients, ditas pseudosimbiosis.[3][28][29][30]
  • O mantenimiento d'a vinculación: o desembolique d'a dependencia emocional no solo se debe a la mena d'apego vivito en a infancia, sino tamién pende d'a reacción de l'individuo debant ixas situacions.[1] A penar d'a vivencia d'apegos inseguros y evitativos, os subchectos qui en rematan desembolicando de dependencia emocional optoron de ninos por vincular-sen de traza estreita con as suyas figuras d'apego. Si a vinculación establita estase mas moderata, a suya autoestima y lo suyo autoconcepto no penderban tan d'os otris y estarban mas positivos.[3][20]

Por atro costato, os principals factors mantenedors d'a dependencia emocional son os siguients:

  • Os esquemas cognitivos construitos mientres a infancia mantienen una serie de pensamientos, creyencias y emocions que determinan a conducta tipica en a edat adulta d'o dependient emocional.[3][20][24][42]
  • O comportamiento sobreprotector d'os pais augmenta la frecuencia de conductas dependients en os fillos, qui, a la suya vegada, enforteixen a conducta parental sobreprotectora.[24] O repertorio conductual d'o dependient emocional, doncas, se mantién a la suya vez por as respuestas que prevoca en a resta de personas con qui interactúa, qui enforteixen ista traza de portar-se.[3][20]

Referencias

[editar | modificar o codigo]
  1. ↑ 1,0 1,1 1,2 1,3 Castelló J. (2000). Análisis del concepto "Dependencia Emocional". I Congreso Virtual de Psiquiatría.
  2. ↑ 2,0 2,1 2,2 2,3 2,4 2,5 2,6 2,7 Moral, M. y Sirvent, C. (2008). Dependencias sentimentales o afectivas: etiología, clasificación y evaluación. Revista Española de Drogodependencias, 33 (2), 150-167. Obtenito de: [1].
  3. ↑ 3,00 3,01 3,02 3,03 3,04 3,05 3,06 3,07 3,08 3,09 3,10 3,11 3,12 3,13 3,14 3,15 3,16 3,17 3,18 3,19 3,20 3,21 3,22 3,23 3,24 3,25 3,26 Anguita, A. PROPUESTA DE INTERVENCIÓN PARA LA DEPENDENCIA EMOCIONAL. SUPERACIÓN DE LA DEPENDENCIA TRAS LA RUPTURA DE LA PAREJA. Facultad de Psicología. Departamiento de Psicología Biológica y de la Salud. Universidad Autónoma de Madrid.
  4. ↑ Hirschfeld, R.M.A., Klerman, G.L., Gough, H.G., Barrett, J., Korchin, S.J. y Chodoff, P. (1977). A measure of interpersonal dependency. Journal of Personality Assessment, 41 (6), 610-618.
  5. ↑ 5,0 5,1 5,2 Bornstein, R.F. (2012). Illuminating a Neglected Clinical Issue: Societal Costs of Interpersonal Dependency and Dependent Personality Disorder. Journal of Clinical Psychology, 68 (7), 766-781.
  6. ↑ 6,0 6,1 Ng, H.M. y Bornstein, R.F. (2005). Comorbidity of dependent personality disorder and anxiety disorders: a meta analytic review. Clinical Psychology: Science and Practise, 12, 195-406.
  7. ↑ 7,0 7,1 Sahar, G. (2008). What Measure of Iterpersonal Dependency Predicts Changes in Social Support? Journal of Personality Assessment, 90 (1), 61-65.
  8. ↑ 8,0 8,1 8,2 8,3 Urbiola, I., Estévez, A. y Iraugi, I. (2014). Dependencia emocional en el noviazgo de jóvenes y adolescentes (DEN): desarrollo y validación de un instrumento. Ansiedad y Estrés, 20 (2-3), 101-114.
  9. ↑ 9,0 9,1 Porcerelli, J.H., Bornstein, R.F., Markova, T. y Huprich, S.K. (2009). Physical Health Correlates of Pathological and Healthy Dependency in Urban Women. The Journal of Nervous and Mental Disease, 197 (10), 761-765.
  10. ↑ Bornstein, R.F. y Gold, S.H. (2008). Comorbidity of personality disorders and somatization disorder: A meta-analytic review. Journal of Psychopathology and Behavioral Assessment, 30, 154-161.
  11. ↑ 11,0 11,1 Santamaría, J.J., Merino, L., Montero, E., Cano, M., Fernández, T., Cubero, … y González- Bueso, V. (2015). Perfil psicopatológico de pacientes con Dependencia Emocional. Cuadernos de Medicina Psicosomática y Psiquiatría de Enlace. Revista Iberoamericana de Psicosomática, 116, 36-46.
  12. ↑ Abuín, M.R. y Rivera, L. de (2015). Dependency, detachment and psychopathology in a nonclinical simple: General relations and gender differences. Is there a new line of inquiry on paranoid pathology? Clínica y Salud, 2, 65-72.
  13. ↑ 13,0 13,1 13,2 Bornstein, R.F. (2006). The Complex Relationship Between Dependency and Domestic Violence. Converging Psychological Factors and Social Forces. American Psychologist, 61 (6), 595-606.
  14. ↑ 14,0 14,1 Aiquipa, J. J. (2015). Dependencia emocional en mujeres víctimas de violencia de pareja. Revista de Psicología, 33, 412-437.
  15. ↑ Germán, I. (2010). La relevancia criminológica de las adicciones sin sustancia a determinadas conductas y de su tractamiento. International e-journal of criminal sciences, 4, 1-23.
  16. ↑ 16,0 16,1 16,2 McClintock, A.S. y Anderson, T. (2015). The Application of Minfulness for Interpersonal Dependency: Effects of a Brief Intervention. Mindfulness, 6, 243-252..
  17. ↑ 17,0 17,1 Cubas, D., Espinoza, G., Galli, A. y Terrones, M. (2004). Intervención cognitivo-conductual en un grupo de pacientes mujeres con dependencia afectiva. Revista de Psiquiatría y Salud Mental Hermilio Valdizán, 5 (2), 81-90.
  18. ↑ 18,0 18,1 Salcedo, A. y Serra, E. (2012). Amores dependientes. Teoría del apego como origen, mantenimiento y solución a la dependencia en el amor. Valencia: Tirant Humanidades.
  19. ↑ Sirvent, C., Moral, M. (2007). La dependencia sentimental o afectiva. 8º Congreso Virtual de Psiquiatría.com Interpsiquis.
  20. ↑ 20,00 20,01 20,02 20,03 20,04 20,05 20,06 20,07 20,08 20,09 20,10 20,11 20,12 20,13 20,14 20,15 20,16 20,17 20,18 Castelló, J. (2005). Dependencia emocional: características y tractamiento. Madrit: Alianza Editorial.
  21. ↑ Aiquipa, J. (2012). Diseño y validación del inventario de dependencia emocional-IDE. Revista IIPSI, 15 (1), 133-145.
  22. ↑ González-Jiménez, A.J. y Hernández-Romera, M. del M. (2014). Emotional Dependence Base on the Gender of Young Adolescents in Almería, Spain. Procedia –Social an Behavioral Sciences, 132, 527-532.
  23. ↑ Bornstein, R.F., Manning, K.A., Krukonis, A.B., Rossner, S.C. y Matrosimone, C. (1993b). Sex differences in dependency. A comparison of objective and projective measures. Journal of Personality Assessment, 61, 169-181.
  24. ↑ 24,0 24,1 24,2 24,3 24,4 Bornstein, R.F. (1992). The dependent personality: Developmental, social, and clinical perspectives. Psychological Bulletin, 112 (1), 3-23.
  25. ↑ 25,0 25,1 Moral, M. y Sirvent, C., Blasco, P. (2012). Autoengaño en adictos y dependientes emocionales. 13º Congreso Virtual de Psiquiatría. Interpsiquis 2012: 1-23.
  26. ↑ 26,0 26,1 26,2 Riso, W. (2009). ¿Amar o depender? Cómo supercar el apego afectivo y hacer del amor una experiencia plena y saludable (3ª, 5ª imp. Ed.). Madrit: Planeta/Zenith.
  27. ↑ 27,0 27,1 Mayor, I. (2000). ¿Por qué siempre nos enamoramos de quien no debemos? Espanya: Ediciones Librería Argentina
  28. ↑ 28,0 28,1 28,2 Moral, M. y Sirvent, C., Blanco, P. (2011). Adicciones y déficits en asertividad. Revista psicología.com, 15.
  29. ↑ 29,0 29,1 Hoogstad, J. (2008). Choice Theory and Emotional Dependency. International Journal of Reality Therapy, 28 (1), 63-68.
  30. ↑ 30,0 30,1 30,2 30,3 Moral, M. y Sirvent, C. (2009a). Dependencia afectiva y género: perfil sintomático diferencial en dependientes afectivos españoles. Revista Interamericana de Psicología/Interamerican Journal of Psychology, 43 (2), 230-240. Obtenito de: http://redalyc.org/resumen.oa?id=28412891004.
  31. ↑ 31,0 31,1 Sirvent, C., Moral, M. (2007). La dependencia sentimental o afectiva. 8º Congreso Virtual de Psiquiatría.com Interpsiquis.
  32. ↑ Fiori, K.L., Consedine, N.S., Denckla, C.A. y Vingerhoets, A.J.J.M. (2015). Crying in context: Understanding Associations With Interpersonal Dependency and Social Supprort. PsychOpen. Interpersona. An International Journal on Personal Relationship, 7 (1), 44-62.
  33. ↑ 33,0 33,1 Lemos, M. y Londoño, N.H (2007). Distorsiones cognitivas en personas con dependencia emocional. Informes Psicológicos, 9, 55-69.
  34. ↑ Mallor, P. (2006). Relaciones de dependencia ¿Cómo llenar un vacío existencial? Revista de Psicoterapia, 17 (1), 65-87.
  35. ↑ Moral, M. y Sirvent, C. (2009b). Dependencia interpersonal como adicción social: perfiles clínicos diferenciales. 10º Congreso Virtual de Psiquiatría. Interpsiquis, Febrero 2009, 1-16.
  36. ↑ Bornstein, R.F. (2011). An interactionist perspective on interpersonal dependency. Current Directions in Psychological Science, 20, 124-128.
  37. ↑ 37,0 37,1 Izquierdo Martínez, S.A. y Gómez-Acosta, A. (2013). Dependencia afectiva: abordaje desde una perspectiva contextual. Psicología: Avances de la Disciplina, 7 (1), 81-91.
  38. ↑ Fraley, R. C. y Shaver, P.R. (1998). Airport separations: A naturalistic study of adult attachment dynamics in separating couples. Journal of Personality and Social Psychology, 75 (5), 1198-1212.
  39. ↑ Hazan, C. y Shaver, P. (1987) Romantic love conceptualized as an attachment process. Journal of Personality and Social Psychology, 52, 511-524.
  40. ↑ Bartels, A. y Zeki, S. (2004). The neural correlates of maternal and romantic love. NeuroImage, 21, 1155-1166.
  41. ↑ 41,0 41,1 Rodríguez de Medina, I. (2013). La dependencia emocional en las relaciones interpersonales. ReiDoCrea: Revista Electrónica de Investigación Docencia Creativa, 2, 143-148.
  42. ↑ Bowlby, J. (1982). Attachment and Loss. Vol. 1. Attachment. Nueva York: Basic Books.

Bibliografía

[editar | modificar o codigo]
  • Bisquerra Alzina, R. Educación para la ciudadanía: el enfoque de la educación emocional.
  • Castelló Blasco, J. Dependencia emocional: características y tractamiento.
  • Castelló Blasco, J. La superación de la dependencia emocional.
  • Castelló Blasco, J. El miedo al rechazo en la dependencia emocional y en el trastorno límite de la personalidad.
  • Congost. S. Manual de dependencia afectiva.
  • Congost. S. Cuando amar demasiado es depender.
  • De la Villa Moral Jiménez, M y Sirvent Ruiz, C. Dependendencias sentimentales o afectivas: etiología, clasificación y evaluación.
  • DSM-IV-TR. Manual diagnóstico y estadístico de los trastornos mentales.
  • Estela Retana Franco, B y Sánchez Aragón, R. El amor como adicción: la visión de los adolescentes y de los adultos.
  • López Sánchez, F. Desarrollo afectivo y social.
  • Mallor Plou, P. Relaciones de dependencia: ¿Cómo llenar un vacío existencial?
  • Riso, W. ¿Amar o depender?: cómo superar el apego afectivo y hacer del amor una experiencia plena y saludable (9edª).
  • Erik Lozao, W. Los límites del amor: cómo amar sin renunciar a ser tu mismo (3ªed).
  • Ruiperez, D y L. Lobo. L.Mi mente es mi enemigo.
  • Sirvent, C y Villa Moral,M. La dependencia sentimental o afectiva.

-

Obteniu de "https://an.wikipedia.org/w/index.php?title=Dependencia_emocional&oldid=2201776"