Chiberelina

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

GA452D, una chiberelina prou común.

As chiberelinas son hormonas vechetals produeitas en os meristemos apicals d'a radiz, fuellas chóvens, chitos y embrions vechechals y que regulan o creiximiento y que influyen en bells procesos de desembolique. Todas as chiberelinas conoixidas son acidos diterpenoides.

Tienen funcions variadas como aturar o periodo de latencia y inducir a cherminación, activar o cambium vascular, estimular a floración en plantas bianyals y en bells casos fa tardar a maturación d'o fruito y l'aviellamiento d'as fuellas. Presenta una acción oposada a l'acido abscisico.

Aplicacions

O intrés por as chiberelinas fuera de Chapón encomenzó dimpués d'a Segunda Guerra Mundial por as suyas posibles aplicacions.

As investigacions en a Universidat de California en a decada de 1960 condicioron a l'uso comercial en 1962 d'ugas sin simient ("ugas de mesa sin simient de Thompson"). Atras fruitas que se consiguen sin simient adintro son as naranchas y clementinas. O procedimiento pa conseguir-lo ye aplicar chiberelinas a ciertas flors no fecundadas a baixas temperaturas y producir un aumento d'a mida d'os ovarios y o desembolique d'un fruito partenocarpico.

En a vinya tamién favoreixen o creiximiento d'os carrazos por disminuir-ne o no numero, producindo-se ugas de mida més gran.

As chiberelinas se fan servir muito en l'agricultura moderna por favoreixer o creiximiento vechetal. En as cols y repollos, que son plantas bianyals se fan servir pa producir un alargamiento. Si s'esporga quimicament un árbol fruital con etileno se puet conseguir aplicando chiberelinas que os fruitos restants se desemboliquen millor.

Bibliografía

• Natividad Ferrer Marí, Miguel Gracia Vicente, Manuel Medina Martínez Bachillerato. Biología y Geología Bruño, 2008.