Bada cheneral en Espanya de 2010

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A bada cheneral en Espanya de 2010 estió una bada cheneral convocata en Espanya o 29 de setiembre de 2010 por os sindicatos Comisiones Obreras y Unión General de Trabajadores contra a reforma laboral de 2010 que aprebó o Gubierno de José Luis Rodríguez Zapatero y que refirmó o Congreso d'os Deputatos o 9 de setiembre d'ixa anyada y que dentró en vigor o 19 de setiembre, y tamién contra a refoma d'o sistema publico de pensions anunciata por o Gubierno. D'atros sindicatos nacionals (Confederación General del Trabajo y Unión Sindical Obrera) s'adibioron a la convocatoria, que tamién recibió o refirme d'asociacions a ran europeu.

Motivacions d'a bada

Seguntes os sindicatos convocants, a respuesta a la crisi economica ha estato una respuesta con mesuras que cargan os costes d'a crisi en os treballadors y pensionistas, mesuras aprebatas seguntes recomendacions d'o Fundo Monetario Internacional y d'o Banco Central Europeu y que aplican teorías neoliberals que nomás faran que fer mas greu a crisi economica y dificultar-ne a recuperación. Ta os sindicatos, a reforma laboral aprebata ye a mas gran agresión contra os dreitos laborals d'os treballadors y treballadoras dende que prencipió a democracia, y que contina con mesuras como a reducción d'o gasto publico, a retallada d'os salarios de funcionarios y a conchelación d'as pensions. Antiparte, creyen que istas mesuras tendrán continidat con a reforma d'o sistema publico de pensions que perlongará a vida laboral d'os treballadors dende os 65 dica os 67 anyos.^[1]

Os sindicatos consideran que con as reformas será mas barato o despido d'os treballadors, incrementando-se asinas a precaridat d'o mercato laboral; que as mesuras farán posible que contine o frau de lei en os ditos contractos d'obra en contractar-se treballadors temporals ta cubrir puestos de treballo de traza permanent; que as reformas penalizan o contracto indefinito en cheneralizar-se as condicions pecuniarias menos favorables d'o contracto de fomento d'o emplego enta o contracto indefinito, baixando-se d'una indemnización de 45 días por anyo treballato con un maximo de 42 mensualidaz enta 33 días por anyo con un maximo de 24 mensualidaz; que se li da prioridat a la negociación en l'interior d'as interpresas sobre os convenios colectivos, reducindo-se asinas a capacidat de negociación d'os treballadors; que se permite a os interpresarios de modificar unilateralment as condicions pactatas con os treballadors; y que se permite a las interpresas de treballo temporal de contractar con l'Administración publica, precarizando-se asinas tamién o emplego en o sector publico.