Tormagal
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Lo tormagal ye una forma de lo terreno que consiste en una costera plena de tormos con una distribución caotica dichós un cinglo, tipicament d'almendrón y present en muitos lugars de lo Baixo Aragón en lo semontano de lo Sistema Iberico[1]. Tamién pueden fer-se en piedras d'arena.
Chenesi
Los tormos s'han produciu por esgallar-se lo livel estructural d'almendrón seguindo a un proceso erosivo que afecta a las archilas que bi ha estratigraficament dichós. Cuan pleve l'augua fa un salto en lo cinglo, a part de baixar por tota la costera. L'acción erosiva chusto baixo lo cinglo por lo salto, la erosión que fan las auguas salvaches baixando por la costera d'archila y la erosión remontant dende lo livel de base local (las riberas) van esgarrapando los materials archilencos, que retaculan paralelament a la costera. Este retacule creya covachos baixo los duros almendrons que se veyen como cinglos, pero plega un inte que lo vueito fa que lo livel d'almendrón s'escache y se formen tormos que redolan por la costera dica que se quedan fitos en un puesto. Como l'augua de plevia baixando por la costera ya no puede transportar-los y la meteorización ye lenta en climas mediterranios continentalizaus estos tormos quedan en meyo de la costera chunto con los que ya bi heba enantes.
Toponimia
En la zona de l'aragonés central se documentan toponimos relativos a estas formacions con xorda intervocalica conservada: Turmacal en Linars de Broto,[2] Tormacal y punta d'el Tromocal en Bielsa.
En bel lugar de Zaragoza, Teruel y comarcas churras a on se charró aragonés en la baixa Edat Meya bi ha microtoponimos relacionaus con estas formacions: Tormagal, Tromagal. Tamién trobamos esta clase de microtoponimos en la Cuenca.
En lo Matarranya reciben la denominación de tormassal en lo catalán local, y trobamos este microtoponimo en Ráfals, igual como en Chert (Castellón).
Referencias
- ↑ Alejando Pérez, José Luis Simón, Manuel J. Vivó. Paisajes naturales de la región del Maestrazgo y Guadalope. Instituto de Estudios Turolenses, Mancomunidad turística del Maestrazgo, Teruel 1983, pp97-98
- ↑ (es) María Pilar Fuertes Casaus, María Isabel Allué Navarro Nombres para un paisaje. Toponimia del Valle de Broto Editau por las propias autoras, 2006. p 98