Druida
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Os druidas estioron un grupo social enantau en a sociedat celta, d'especialización en temas relichiosos, literarios y filosoficos. Os druidas representaban una institución pan-tribal, que teneba os centros en Carnutum (Galia), Mona (isla en Galas) y Tara (centro d'Irlanda).
No ye demostrato que haiga existito a institución druidica entre os galatas, os galos danubians, os galos cisalpins, u os celtas hispanos. Manimenos en publicacions de tipo esoterico y pseudohistorico se da por feito y ye una creyencia prou extendita.
A relichión dirichita por os druidas se diz druidismo y ye una evolución d'o politeísmo celta.
A palabra druida provién d'o latín druis, druidis; palabra que escribe Chulio César por primera vegata pa latinizar una palabra gala que se pareixe muito a l'antigo gaelico drui. S'ha reconstruito en protocelta a palabra druwides, y l'analís etimolochica amuestra que significa os muito sabios (dru ye un sufixo superlativo y wid ye una radiz indoeuropea que significaba conoixencia, sabiduría).
As formas galesa derwydd y bretona drouiz son reconstrucions cultas que existen dende o sieglo XVIII. A evolución natural de druwides ye draoi, en gaelico moderno, que significa bruixo, y dryw en galés, que significa reyezuelo.
Druida ye un termin chenerico pa tota a clase sacerdotal celta, pero en meyo d'esta clase sacerdotal bi heba sozcategorías con diferents nombres , y a terminolochía ha cambeato en o periodo que bi ha entre a conquiesta de Galia por César y a cristianización d'Irlanda por Sant Patricio.
En a Irlanda d'o sieglo IV, sieglo d'a cristianización, se diz drui nomás que a la part inferior d'a clase sacerdotal, part inferior marguinata en o nuevo orden cristiano y dedicata a la bruixería. A parte superior d'a clase sacerdotal ye dita Fili y teneba estas especializacions:
- Sencha: historiador, encargato de mantener y difundir a tradición historica.
- Brithem: chuez, lechislador, embaixador.
- Scelaige: especializato en relatos epicos y mitolochicos.
- Cainte: mayestro d'o canto machico, invocacions, maldicions, bendicions.
- Liaigo: medico, conoixedor d'as plantas medicinals.
- Cruitire: arpista.
- Deogbare: escanciador.
Dende o sieglo XVIII han amaneixito movimientos neodruidicos que pretenden continuar a tradición d'os druidas historicos, o cual ye muito discutible, porque d'o druidismo historico se'n conoixe poco y porque os neodruidas presentan mezcla de muitas influencias misticas y esotericas, occidentals y orientals.