Audal·lá ben Hakam

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Audal·lá ben Hakam عبد الله ابن حكم
Rei d'a Taifa de Saraqusta
Rei d'a Taifa de Saraqusta
23 d'agosto de 1038 - 20 de setiembre de 1038
Predecesor	Mundir II
Succesor	Sulaymán ben Hud al-Musta'in
Naixencia	?
Muerte	1038
Dinastía	Tuchibín

Audal·lá ben Hakam al-Tuchibí al-Hayib (†1038) estió rei d'a taifa de Saraqusta mientres 28 días en 1038.

Audal·lá ben Hakam yera un d'os cadís u gubernadors de Mundir II. Endrezó una conspiración ta derrocar a lo suyo primo Mundir II. Con o refirme de bels partidarios consiguió que bellas faccions se rebelasen en o berano de 1038 contra o rei y prenesen l'alcazar reyal o 23 d'agosto de 1038. Astí fuoron executatos Mundir II y o suyo visir chodigo Yequtiel ben Ishaq.

Heba preparato prou bien o suyo golpe de Estato, ya que rapidament prencipió a cudir con o suyo nombre y nuevo títol de hayib («chambelán»), que yera o mesmo que emplegó Almanzor y toz os reis de taifas como simbolo d'o suyo poder. Abd Allah ibn Hakam quereba recuperar o poder que teneba o suyo lolo Abd al-Rahman en Saraqusta, levato a l'ostracismo por Mundir I, que formaba parti d'una rama segundaria d'iste linache. Manimenos nomás estió rei dica o 20 de setiembre de 1038 ya que l'asasín de Mundir II l'heba promeso a l'allora gubernador de Leida Sulaymán ben Hud al-Musta'in entregar-le o poder politico, pues Sulaymán ben Hud perteneixeba a una d'as mas poderosas familias y teneba gran prestichio militar, pero no cumplió lo pauto. Por ixo Sulaymán ibn Hud, aduyato por Ismail de Toledo decidió dentrar en Saraqusta, a on antimás trobó o refirme d'a población. A población d'a ciudat pronto lo veyió a Abd Allah como un usurpador y antimás conoixeban y estimaban a Sulaymán ibn Hud Abd Allah por lo que Abd Allah s'atrincheró en l'alcázar, y a la fin enrestito por o pueblo habió de fuyir y se retiró dende allora a la Fortaleza de Rueda.

Fuents

• CERVERA FRAS, M ª José, El reino de Saraqusta, Zaragoza, CAI, 1999. ISBN 8488305931
• CORRAL, José Luis, Historia de Zaragoza. Zaragoza musulmana (714-1118), Zaragoza, Ayto. de Zaragoza y CAI, 1998. ISBN 8480691557
• MONTANER FRUTOS, Alberto, "Introducción histórica" al capítulo "El palacio musulmán", en: Bernabé Cabañero Subiza et alt., La Aljafería (vol. I), Zaragoza, Cortes de Aragón, 1998. págs. 35-65. ISBN 8486794978
• VIGUERA MOLINS, Mª Jesús, Aragón musulmán, Zaragoza, Mira editores, 1988. ISBN 8486778069
• VIGUERA MOLINS, Mª Jesús, El islam en Aragón, Zaragoza, CAI, (Col. «Mariano de Pano y Ruata», nº 9), 1995. ISBN 8488305273