Ánchel Conte

Ánchel Conte
Información personal
Calendata de naixencia	15 d'octubre de 1942
Puesto de naixencia	Alcoleya de Cinca (Uesca, Aragón)
Calendata de muerte	22 de noviembre de 2023
Puesto de muerte	Almería (Almería, Andalucía)
Ocupación	Escritor, historiador y etnografo

Ánchel Conte Cazcarro (Alcoleya de Cinca, Uesca, 15 d'octubre de 1942 - Almería, Almería, Andalucía, 22 de noviembre de 2023) estió un escritor, historiador y etnografo aragonés.

Biografía

Doctor en Historia y catedratico d'ensenyanza segundaria, estió cofundador d'a revista Andalán, d'o Consello d'a Fabla Aragonesa y fundador d'o grupo folclorico Viello Sobrarbe. Dende 2003 se chubiló, residindo en os zaguers anyos d'a suya vida en Almería, en Andalucía.

Activo militant, reorganizó o Partido Comunista de España (PCE) en a provincia de Teruel en os zaguers anyos d'o Franquismo, y dimpués pasó a militar en Ezquierda Unida d'Aragón. En 2008, se presentó como candidato a o Senau Espanyol por a provincia de Uesca en a lista electoral d'Ezquierda Unida.

Estió miembro de l'equipo fundador d'Andalán, revista aragonesista y escrita de raso en castellano, fueras de bels articlos en idioma aragonés que, entre atros, publicaba Ánchel Conte. Yera tamién entre os fundadors d'o Consello d'a Fabla Aragonesa. Entre a suya estancia en Aínsa como profesor d'Historia, fació un intenso treballo investigader d'o folklore d'a comarca de Sobrarbe y fundó l'agrupación folklorica Viello Sobrarbe.

Yera miembro d'o Consello asesor d'o I Congreso ta ra normalizazión de l'aragonés, manimenos no firmó os alcuerdos graficos de 1987, anque escribió dimpués toz os suyos libros con ixa ortografía. No aceptó participar en o II Congreso de l'Aragonés, refusando fer parte de l'Academia de l'Aragonés.

Estió una fegura sinyalera en a literatura moderna en aragonés. Escribió poesía, novela y relatos curtos. En a primera escribió tres poemarios: No deixez morir a mía voz (1972), O tiempo y os días (1996) y E zaga o mar o desierto (Premio Pedro Saputo, 2002).

En prosa estió autor de dos libros de relatos: O rafe d'o espiello (1997) y De ordo sacerdotalis (2004), y atras dos novelas: O bolito d'as sisellas (Premio Pedro Saputo, 2000) y Aguardando lo zierzo (Premio Ziudá de Balbastro 2002).

Como investigador tiene publicatos mas de cuaranta articlos d'historia medieval altoaragonesa, publicaus en revistas y actas de congresos nacionals y internacionals y tres obras importants en a historiografía aragonesa: La Encomienda del Temple de Huesca (1986) y La aljama de moros de Huesca (1995), Los moriscos de la ciudad de Huesca: una convivencia rota (2009) y La aljama de moros de Barbastro (2013). Beluns d'os suyos articlos y comunicacions tamién los escribió en aragonés, estando asinas pionero en o emplego d'ista luenga en o campo d'a Historia. Tamién fació parte de l'equipo que escribió l'ensayo sinyalero El aragonés: identidad y problemática de una lengua (1977).

Recullió cuantos premios literarios, incluyindo-ie o Premio de Cuentos en Aragónes Premio Ziudá de Balbastro (1970), premios en a Fiesta d'a Poesía de Uesca de 1968, 1969, 1970, 1971. En 2000 y 2002 recullió o Premio Pedro Saputo a la millor obra en aragonés, por O bolito d'as sisellas y E zaga o mar o desierto. En 2001 recullió o premio d'a Universidat de Zaragoza ta poesía en aragonés por o poemario Como plebia sobre o bientre, que s'edito fendo parte d'o poemario E zaga o mar o desierto (2002). En 2002 obtenió o Premio Ziudá de Balbastro por Aguardando lo zierzo.

En 2009 o Gubierno d'Aragón li atorgó a Medalla a lo Merito Cultural, en reconoiximiento a la suya "dilatada trachectoria profesional en a recuperación de tradicions aragonesas, d'o suyo folklore y a suya luenga, l'aragonés, a la que esfendió igual con os suyos estudios como con a creyación d'institucions de refirme, fendo-la vehiclo d'os suyos treballos d'investigación historica".

Estió tamién miembro d'a Sociedat de Lingüistica Aragonesa, encara que l'albandonó posteriorment en tener bellas discrepancias.

En 2021 dentró, como miembro fundador, en l'Academia Aragonesa d'a Lengua, pa la que fue nombrau per lo Gubierno d'Aragón, y fue esleyiu lo primer Director de l'Instituto de l'Aragonés. En o suyo mandato como director, l'Instituto de l'Aragonés aprebó la Ortografía de l'Aragonés.

Obra literaria

Poemarios:

• No deixez morir a mía voz (1972; reeditada en 1986 y traducida ta o castellano y o ruso en 2002).
• O tiempo y os días (1996).
• E zaga o mar o desierto (2002); Premio Saputo a la millor obra en aragonés de 2002.
• Luna que no ye luna / Luna que no es luna (2014).

Coleccions de relatos:

• O rafe d'o espiello (1997)
• De ordo sacerdotalis (2004)

Novelas:

• O bolito d'as sisellas (2000); Premio Saputo a la millor obra en aragonés de 2000.
• Aguardando lo zierzo (2002); Premio Ciudat de Balbastro, 2002; traducida tal o ruso en 2004 y ta lo castellano (como Esperando al cierzo), en 2007, y ta lo francés (2009).

Ha publicau poemas y cuentos en Argensola, Andalán, Fuellas, Rolde, Luenga e Fablas y en atras revistas. Bels poemas suyos s'han traduciu ta o castellano, francés, anglés, alemán y portugués.

Referencias

• Datos: Q3078460