Soziedá

De Biquipedia

A soziedá ye o conchunto de presonas que comparten fins, procupazions y costumbres, y que interautúan entre ellas establindo una comunidá. Tamién ye una entidá poblazional u abitat, que encluye os abitantes y a suya redolada, tot el interrelazionato con un proyeuto común, que lis da una identidá de pertenenzia. Antimás senifica una colla con lazos economicos, ideolochicos y puliticos y supera o conzeuto de nazión-estau: sería a soziedá ozidental como una soziedá de nazions, ezetra. Todas istas soziedaz son l'obcheto d'estudio d'as zenzias sozials, en espezial d'a soziolochía, antropolochía, ecolochía, ezetra. Istas agrupazions no han d'estar conzepzions abstrautas, han de tener una representazión en un meyo, cheneralmén o territorio, y un alto grau d'aizión sozial conchunta, en atro caso no pueden estar obcheto d'una metodolochía con metodos soziolochicos ta o suyo analís y farían parti d'o conoximiento filosofico, teolochico u d'atros sabers no empiricos. Antimás d'os abitadors, a redolada y o proyeuto sozietario, pueden adibir-se-ie atras categorías t'a definizión de soziedá seguntes a especialidá d'o proyeuto u d'o suyo grau de desembolique. Isto será a tecnolochía alcanzada en os meyos de produzión, dende una soziedá primitiba con a simpla tecnolochía espezializada de cazataires -mui poquet manefizios-, dica una soziedá muderna con complexa tecnolochía -muitos manefizios-, prauticamen en todas as espezialidaz. Istos estadios de zebilizazión encluyirán o estilo de bida y o suyo ran de calidá, asinas que será simple y de baxa calidá comparatiba en a soziedá primitiba y complexo u sofisticato con alta calidá comparatibamén en a soziedá industrial. A calidá de bida comparatibamén ye controbertito pues tien aspeutos subchetibos respeutibe á cómo ye entendita por os suchetos (no podemos saber cuanto disgraziaus se sentiban os ombres preistoricos por no tener telebisión).