Poligamia

De Biquipedia
Países en os cuals s'autorizaba a polichinia en 2006 (en verde).

Se conoix con o nombre de poligamia (d'o griego polus, "cuantos", y gamos, "matrimonio") a una traza de relación familiar u afectiva seguntes a cual una persona d'un sexo tiene a la vegata mes d'una persona de l'atro sexo fendo-ie parte d'a dita relación. Cal distinguir entre polichinia, cuan a relación ye entre una persona de sexo masculín y cuantas de sexo femenín, y poliandría, que ye a situación que se troba cuan en a relación bi ha nomás que una persona de sexo femenín por cuantas de sexo masculín. Cal parar cuenta que, encara que alto u baixo o 80% d'as sociedaz humanas que se conoixen practicaban legalment a poligamia, nomás arredol de l'1% d'ixas sociedaz poligamicas practicaban u practican a poliandría, estando a resta d'ixas sociedaz unas sociedaz de traza polichinica. Antiparte, tamién cal decir que, encara que bella sociedat en permita a suya practica, en realidat un 60-80% d'as unions familiars son de feito monogamas.

Cal tamién diferenciar a poligamia d'os matrimonios grupals, en os cuals se troba una unión formata por cuantas personas de sexo masculín y cuantas personas de sexo femenín, y tamién cal diferencia-la d'a bigamia, que ye a forma como se conoix en luengache churidico a situación en a cual una persona fa una unión cn una atra sin que, antis d'ista unión, haiga desapareixito legalment o vinclo con una atra persona.

En zaguerías, cal tamién parar cuenta que gosa emplegar-se vulgarment a palabra poligamia ta referir-se a ormino a una polichinia en sentito estricto.

Se veiga tamién[editar | modificar o codigo]