Familia

Iste articlo ye sobre a familia como conchunto de presonas; ta atros usos, se veiga Familia (desambigación).

Retrato de familia, por Francisco de Goya y Lucientes.

Una familia ye, dende o punto d'anvista d'a Sociolochía, un conchunto de presonas unitas por lazos de parentalla que son prencipalment de tres tipos:

• Matrimonio, a sobén d'una parella, u de más presonas en o caso d'as sociedatz poligamas
• Filiación entre pais e fillos
• Relación entre chirmans

Tamién se puet diferenciar a familia seguntes o grado d'a relación entre os suyos miembros:

• Familia nucleyar - pais y fillos (si bi'n ha)
• Familia patriarcal u ampla - amás d'a familia nucleyar, encluye os lolos (muito a sobén consideratos os patriarcas), tíos, primos y más parients de primera linia consanguinia.

Se considera que una familia tien, dende o punto d'anvista d'o Dreito, una presonalidat churidica propia, con un patrimonio común (y en a nuestra sociedat aragonesa, como en a resta d'as sociedatz d'o nuestro ambito cultural, con un domicilio común). Antiparte, a relación familiar creya entre os suyos miembros una obligación de tipo churidico de solidaritat, con l'obchectivo de protecher a os suyos miembros y en garantizar o suyo desenvolique social, economico u afectivo.