Pelegrinache
Un pelegrinache u pelegrinación ye un viache ta un puesto considerato como sagrato por a relichión pa obtener os favors d'una divinidat u santo u aumentar l'autoconoixencia mientres a ruta. As rutas d'os pelegrins asobén creyan muita riqueza por o comercio y o trafego de presonas y han esdevenito una atracción pa o torismo moderno. Un pelegrín ye un viachero que visita qualque puesto sagrato, quasi siempre por motivos relichiosos.
Etimolochicament pelegrín significa "extranchero", "expatriato" y a connotación relichiosa la prenió por a naturaleza d'os puestos por on se feba o pelegrinache. Dimpués o termin s'extendió a qualsiquier puesto destacato, como por eixemplo as casas d'os artistas pa os fans. Un eixemplo destacato d'este pelegrinache laico sería a casa d'Elvis Presley.
En a Europa d'a Edat Meya se distinguiban tres clases de pelegrins:
- Romeus, que iban ta Roma.
- Palmers, que iban ta Cherusalem.
- Pelegrins propiament ditos, os que iban ta Santiago de Compostela muitos d'ells seguindo o Camín de Sant Chaime.
