Metal gotico
O metal gotico (en anglés: gothic metal u goth metal) ye un chenero mosical que naix a Europa y Estatos Unitos ta os encomienzos d'o decenio de 1990, y que mana prencipalment d'a encorporación d'elementos d'o rock gotico en o heavy metal. Manimenos, qualques concepcions erronias han leato posteriorment a una definición popular més imprecisa d'o chenero.
En o suyo orichen, se definiba como una forma de doom metal que ampraba bells aspectos d'o rock gotico, prencipalment a inclusión de voces femeninas de tonalidatz eterias. Grupos precursors d'o chenero como Paradise Lost, Theatre of Tragedy u Type O Negative estioron d'os primers a ser clamatos grupos de metal gotico.
Per haber contribuito a fer amplo uso de voces femeninas, se pasó a creyer entibocatament que qualsiquier grupo de metal con una cantant perteneixeba ya a o chenero "gotico". Asinas, se i son incluitos a ormino grupos de metal sinfonico como Nightwish, After Forever u Epica, u de rock alternativo, como Evanescence. Altros grupos pueden considerar-se de metal gotico en bells intes d'a suya trachectoria, como Lacuna Coil, que en yera en os suyos inicios, pero que mudó dimpués ta un metal alternativo.
