Interacción nucleyar fuerte

De Biquipedia
Ir ta: navego, busca
Articlo d'os 1000

A interacción nucleyar fuerte u interacción fuerte, tamién dita fuerza nucleyar fuerte u simplament fuerza fuerte ye, en fisica de particlas, una d'as quatre fuerzas fundamentals de l'Universo. As atras tres son a gravitación, o electromagnetismo y a fuerza nucleyar feble. A escala atomica, ye unas 100 vegatas mas fuerte que o electromagnetismo, que a la vegata ye quantos ordens de magnitut mas fuerte que a fuerza nucleyar feble y a gravitación.

A fuerza nucleyar fuerte actua sobre totz os hadrons, mesons y barions, as particlas composatas formatas por quarks y antiquarks. A interacción d'ista fuerza ye portiata por uns bosons ditos gluons, de manera equivalent a la fuerza electromagnetica que ye portiata por os fotons. Ista fuerza ye a responsable de que os quarks se mantengan unitos ta formar os barions (como os protons u os neutrons) y os mesons (como os pions u os kaons), y tamién ye a responsable de que os protons y os neutrons se mantengan unitos a o nuclio.[1] A fuerza nucleyar fuerte tien un alcance d'arredol d'un femtometro (de vegatas dito fermi en honor d'Enrico Fermi), uns 10−15 metros,[2] y ha d'estar prou fuerte como ta contrarestar a intensa fuerza repulsiva que bi ha entre os protons, a enerchía d'a fuerza nucleyar fuerte entre dos protons ye de l'orden de MeV (megaelectrón volt). A fuerza nucleyar fuerte no se veye afectata por a carga electrica d'as particlas, afectando por igual a protons y neutrons. A teoría que esplanica ista fuerza ye a cromodinamica quantica (QCD de l'anglés quantum chromodynamics), que fue proposata en 1973 por Harald Fritzsch, Heinrich Leutwyler y Murray Gell-Mann.[1][3]

Referencias[editar | editar código]